ডিমৌ আৰক্ষী থানাৰ অন্তৰ্গত পালেঙীৰ দুজনকৈ পলাতক আচামীক অৱশেষত আৰক্ষীয়ে গ্ৰেপ্তাৰ কৰিবলৈ সক্ষম হয়। ইয়াৰে এজন আচামীয়ে ৰঙালী বিহুৰ দুদিন পূৰ্বে নিজ মাতৃক চোকা দাৰে হানি-খুচি হত্যাৰ চেষ্টা কৰি পলাতক হৈ থকা পালেঙী এৰালতলী গাঁৱৰ নিৱাসী কৃষ্ণ নেওগক(২৪) ডিমৌ আৰক্ষীয়ে শণিবাৰে সন্ধিয়া গ্ৰেপ্তাৰ কৰে।
উল্লেখ্য যে কৃষ্ণই যোৱা ১১ এপ্ৰিলৰ পুৱতি নিশা সুৰামত্ত অৱস্থাত ঘৰত প্ৰৱেশ কৰি ৭০ বছৰীয়া বৃদ্ধা মাতৃ হিৰণ্য নেওগক ধন বিচাৰে। মাতৃয়ে টকা দিবলৈ অমান্তি হোৱাত পুত্ৰই এখন চোকা দাৰে উপৰ্যুপৰি আক্ৰমণ কৰাৰ উপৰি মৰিয়াই মৰিয়াই অকথ্য নিৰ্যাতন কৰে আৰু ঘটনাস্থলীৰ পৰা পলায় যাবলৈ সক্ষম হয়।
অৱশ্যে কিছুসময়ৰ পিছত স্থানীয় দুজনমান লোক নেওগৰ ঘৰত উপস্থিত হৈ মুমুৰ্ষূ অৱস্থাত বৃদ্ধাগৰাকীক উদ্ধাৰ কৰে আৰু নিশাই ডিমৌ চিকিৎসালয়ত ভৰ্তি কৰে। পিছত উন্নত চিকিৎসাৰ বাবে ডিব্ৰুগড় অসম চিকিৎসা মহাবিদ্যালয়লৈ প্ৰেৰণ কৰা বৃদ্ধাগৰাকী বৰ্তমান সংকটজনক অৱস্থাত চিকিৎসাধীন হৈ আছে।
আনহাতে ডিমৌ আৰক্ষীয়ে ঘাতক পুত্ৰগৰাকীৰ বিৰুদ্ধে ৮৮/১৮ গোচৰ আৰু ৩২৬/৩২৫ ধাৰাত দুটা গোচৰ পঞ্জীয়ন কৰি জেল হাজোতলৈ প্ৰেৰণ কৰিছে।
ইফালে আন এজন পলাতক আচামী পালেঙী কেচুৱনী গাঁৱৰ হেমন্ত শেনচোৱাকো (২৫) আৰক্ষীয়ে দিচাং মাজগাঁৱৰ এটা উদ্যোগ প্ৰতিষ্ঠানৰ পৰা আজি দুপৰীয়া গ্ৰেপ্তাৰ কৰে।
নিজ খূড়াকৰ জীয়েকক শ্লীলতা হানি কৰাৰ অভিযোগৰ ভিত্তিত আৰক্ষীয়ে ৭৮/১৮ গোচৰৰ ভিত্তিত আৰু ৪৪৮/৩৫৪(বি)/৩২৫/৫০৬ ধাৰাত হেমন্তক গ্ৰেপ্তাৰ কৰে।
মনকৰিবলগীয়া যে পালেঙী কেচুৱনী গাঁৱৰ লোকসকলে অভিযোগকাৰী যুৱতীৰ অভিযোগ সহজভাৱে ল’ব পৰা নাই। যুৱতীগৰাকীয়ে সু পৰিকল্পিতভাৱে হেমন্তৰ বিৰুদ্ধে অভিযোগ উত্থাপন কৰা বুলিহে চৰ্চা চলিছে সমগ্ৰ অঞ্চলটোত।
