ভোটাৰক সচেতন কৰিবৰ বাবে পশ্চিম গাৰো পাহাৰ জিলাৰ প্ৰশাসনে তুৰাত ভিভিপিএটিৰ (VVPAT) এটা পৰীক্ষামূলক প্ৰদৰ্শনী অনুষ্ঠিত কৰে। উক্ত অনুষ্ঠানটোত ৰাজ্যখনৰ ৰাজনৈতিক দলসমূহৰ প্ৰতিনিধিসকল উপস্থিত আছিল। এই পৰীক্ষামূলক প্ৰদৰ্শনীটোৰ আঁত ধৰে জিলাখনৰ উপায়ুক্ত ৰাম সিঙে। ‘আটাইবোৰ ভোটকেন্দ্ৰতে ভিভিপিএটি (VVPAT)ৰ ব্যৱহাৰ কৰা হ’ব আৰু ইয়াৰ জৰিয়তে ভোটাৰে তেওঁলোকে প্ৰদান কৰা ভোটৰ সংক্ষিপ্ত বিৱৰণ দেখা পাব।’ উপায়ুক্ত ৰাম সিঙে কয়। তেওঁ জনায় যে জিলাখনৰ ৪৭৩ টা ভোটকেন্দ্ৰৰ আটাইকেইটাতে ভিভিপিএটিৰ (VVPAT) ব্যৱহাৰ হ’ব।
উল্লেখযোগ্য যে মেঘালয়ত পোনপ্ৰথম বাৰৰ বাবে এই ভিভিপিএটি (VVPAT) ৰ ব্যৱহাৰ হ’ব। এই VVPAT ৰ জৰিয়তে ভোটাৰ এজনে ভোটিং মেচিনত তেওঁৰ ভোটটো দিয়াৰ পিছত নিজৰ ক্ৰমিক নম্বৰ, নাম আৰু যাক ভোট দিছে সেই প্ৰাৰ্থী বা তেওঁৰ দলৰ প্ৰতীকৰ বিৱৰণ ভিভিপিএটি মেচিনৰ স্ক্ৰীনত দেখা পাব আৰু লগতে একেখিনি তথ্য ছপা কৰা এটুকুৰা কাগজ পাব। এই বেলট শ্লিপ সাত ছেকেণ্ডৰ বাবে দৃশ্যমান হৈ থাকিব আৰু তাৰ পিছত ছিগি প্ৰিণ্টাৰৰ ড্ৰ’প বক্সত জমা হৈ যাব।
আজিৰ এই পৰীক্ষামূলক প্ৰদৰ্শনী সভাখনত বিভিন্ন ৰাজনৈতিক দলৰ জনপ্ৰতিনিধিৰ লগতে সংবাদ মাধ্যমৰ লোকো উপস্থিত আছিল। জনপ্ৰতিনিধিসকলে ভিভিপিএটি মেচিনবোৰত নিজৰ ভোট প্ৰদানৰ অনুশীলনমূলক প্ৰয়াস কৰি চায়।
আনহাতে উপায়ুক্ত সিঙে ছ’চিয়েল মিডিয়াত ই ভি এম বোৰ সন্দৰ্ভত বিৰূপ প্ৰচাৰ তথা চৰ্চা হৈ থকাৰ পৰিপ্ৰেক্ষিতত এই সজাগতামূলক অনুশীলন কৰা হৈছে। ‘এই পৰীক্ষামূলক প্ৰদৰ্শনী ৰাজনৈতিক দলবোৰ আৰু গাওঁৰ ভালেসংখ্যক ভোটাৰৰ আগত কৰা হৈছে এই বাবেই যে ই ভোটাৰসকলৰ আত্মবিশ্বাস বৃদ্ধি কৰিব আৰু ভুল ধাৰণা আঁতৰাব।’ উপায়ুক্ত সিঙে কয়।
VVPAT ৰ এই পৰীক্ষামূলক প্ৰদৰ্শন কাৰ্য্যসূচীত উপস্থিত থকা প্ৰতিনিধিসকলৰ মাজত আছে কংগ্ৰেছৰ গ্ৰীথেলচন এৰেঙ, এন পি পিৰ মেথিয়াছ মাৰাক, গাৰো নেশ্যনেল কাউন্সিলক প্ৰতিনিধিত্ব কৰা আগষ্টাইন মাৰাক।
মই ভিভিপিএটিৰ পৰীক্ষামূলক প্ৰদৰ্শনীত ভাগ লৈ বেচ সন্তোষ পাইছো। মোৰ দ্বাৰা দিয়া ভোট আৰু বেলট শ্লিপৰ তথ্য একেই ওলাইছে। ই ভোটাৰৰ সন্দেহ দূৰ কৰিব।’ এইদৰে কয় গ্ৰীথেলচন এৰেঙে। এন পি পি তথা জি এন চিৰ প্ৰতিনিধি দুজনেও প্ৰক্ৰিয়াটোত নিজৰ সন্তুষ্টি ব্যক্ত কৰে।
আনহাতে পশ্চিম গাৰোপাহাৰ জিলাৰ উপায়ুক্তজনে সকলো চৰকাৰী বিষয়াকে সমাগত নিৰ্বাচন সম্পৰ্কীয় প্ৰশিক্ষণ কাৰ্য্যসূচীত নিশ্চিত যোগদান কৰিবলৈ নিৰ্দেশ দিয়ে।
