আজি ৰাজ্যৰ আৰক্ষী সঞ্চালক প্ৰধানৰ দায়িত্ব লোৱা আৰক্ষী বিষয়া কুলধৰ শইকীয়াই দায়িত্ব গ্ৰহণৰ প্ৰথম দিনটোতে সংবাদমেল সম্বোধন কৰে। সংবাদমেলত শইকীয়াই বহুকেইটা গুৰুত্বপূৰ্ণ বিষয়ত মন্তব্য প্ৰকাশ কৰে।
ৰাজ্যবাসীৰ নিৰাপত্তা নিশ্চিত কৰা, নাৰীজনিত অপঘটনা ৰোধ কৰা, ৰাজ্যখনত ক্ৰমবৰ্ধিত অপৰাধ ৰোধ কৰা, মৌলবাদ হ্ৰাস কৰা, মানল সৰবৰাহ ৰোধ কৰা আদিৰ ক্ষেত্ৰত সবল পদক্ষেপ লোৱা হ’ব বুলি মন্তব্য কৰে নৱ নিযুক্ত আৰক্ষী সঞ্চালক প্ৰধানজনে।
আনহাতে যোৱা ২২ এপ্ৰিলত প্ৰাতঃভ্ৰমণলৈ যোৱাৰ পিছৰ পৰাই সন্ধানহীন হৈ থকা এসময়ৰ পি চি জিৰ সদস্য ৰেৱতী ফুকন বিষয়টোত নিজৰ মত দি শইকীয়াই কয়- ফুকনৰ নিৰুদ্দেশৰ ঘটনাটোৰ উচ্চ পৰ্য্যায়ৰ তদন্ত আছে আৰক্ষীয়ে। ঘটনাটোক বিভিন্ন দৃষ্টিকোণেৰে চোৱা হৈছে বুলিও তেওঁ তাৎপৰ্য্যপূৰ্ণ মন্তব্য কৰে। তেওঁ কয় যে ৰেৱতী ফুকন বেংককলৈ যোৱাৰ কোনো তথ্য নাই।
আৰক্ষী সঞ্চালক প্ৰধান হিচাপে নিজৰ নিযুক্তিৰ বাবে মুখ্যমন্ত্ৰী সৰ্বানন্দ সোণোৱাললৈ কৃতজ্ঞতা প্ৰকাশ কৰে শইকীয়া। তেওঁ সংবাদ মাধ্যমৰ ভূমিকাকো প্ৰশংসা কৰে। শইকীয়াই কয় যে যোৱা বছৰবোৰত সংবাদ মাধ্যমৰ বাবেই ডাইনী হত্যাৰ ঘটনা হ্ৰাস হৈছে।
উল্লেখযোগ্য যে শইকীয়া এজন সুখ্যাত গল্প লেখকো। তেওঁৰ গল্পই অসমীয়া সাহিত্যত অতি উচ্চস্থান লাভ কৰি আছে। সাহিত্য অকাডেমি পোৱা আৰক্ষী বিষয়া জনৰ গল্পৰ অসংখ্য অনুৰাগীও আছে।
