যি সময়ত কেন্দ্ৰীয় চৰকাৰে প্ৰৱৰ্তন কৰিব বিচৰা নাগৰিকত্ব সংশোধনী বিধেয়কৰ সমৰ্থনত ৰাজ্যৰ বিজেপি নেতৃত্বাধীন চৰকাৰ আৰু বিজেপি দলে অৱস্থান গ্ৰহণ কৰি বিভিন্ন পৰ্যায়ৰ নেতা-কৰ্মীয়ে বিভিন্ন বিভ্ৰান্তিকৰ মন্তব্য প্ৰদান কৰিছে, সেই সময়তে মিত্ৰজোঁট চৰকাৰখনৰ অন্যতম অংশীদাৰ অসম গণ পৰিষদ দলে বিধেয়কখনৰ বিৰূদ্ধে অহৰহ আন্দোলন কাৰ্যসূচী গ্ৰহণ কৰা কাৰ্যই ৰাজনৈতিক মহলত খলকনিৰ সৃষ্টি কৰিছে।
এই প্ৰতিবাদৰ অংশ হিচাপে ৰাজ্যৰ বিভিন্ন স্থানত দলটোৱে প্ৰতিবাদী কাৰ্যসূচী গ্ৰহণ কৰি ৰাজ্যৰ ৰাজনীতি উত্তাল কৰি ৰাখিছে। শুকুৰবাৰে অগপৰ প্ৰতিষ্ঠাপক সভাপতি তথা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ নেতৃত্বত দলটোৰ নগাঁও সমিতি আৰু উৰিয়াগাঁও আঞ্চলিক সমিতিৰ যৌথ উদ্যোগত উৰিয়াগাঁৱত জাতিধ্বংসী বিধেয়কখনৰ বিৰুদ্ধে এক জোঁৰ সমদল উলিয়াই প্ৰতিবাদ সাব্যস্ত কৰে।
স্থানীয় কেবাটাও সংগঠন আৰু ৰাইজৰ সহযোগত উলিওৱা এই জোঁৰ সমদলে উৰিয়াগাঁৱৰ ৩৭ নং ৰাষ্ট্ৰীয় ঘাইপথ কঁপাই তোলে। কেবা শতাধিক প্ৰতিবাদকাৰীয়ে হাতে হাতে জোৰ লৈ কেন্দ্ৰীয় চৰকাৰ, প্ৰধানমন্ত্ৰী নৰেন্দ্ৰ মোদী আদিৰ বিৰুদ্ধে বিভিন্ন শ্লোগান দি এক উত্তাল পৰিৱেশৰ সৃষ্টি কৰে।
জোঁৰ সমদলত অংশ লৈ প্ৰাক্তন মুখ্যমন্ত্ৰী তথা স্থানীয় বঢ়মপুৰ সমষ্টিৰ বিধায়ক মহন্তই কয় – বিধেয়কখন আইনত পৰিণত হ’লে অসমীয়া জাতি সংখ্যালঘুত পৰিণত হ’ব। অসমৰ ভাষা-সংস্কৃতিও বিপন্ন হ’ব। সেয়ে কোনো কাৰণতেই এই বিধেয়কখন মানি লোৱা নহয়।
অসমৰ ৰাইজৰ আৱেগ-অনুভূতিক সন্মান জনাই কেন্দ্ৰীয় চৰকাৰে শীঘ্ৰেই বিধেয়কখন প্ৰত্যাহাৰ কৰিব লাগে। এই ক্ষেত্ৰত অসম চৰকাৰে বলিষ্ঠ ভূমিকা গ্ৰহণ কৰা উচিত। প্ৰসংগ ক্ৰমে তেওঁ বিধেয়কখনৰ বিৰুদ্ধে সকলো স্তৰৰ ৰাইজক ৰাজপথত উলাই আহিবলৈ আহ্বান জনায়।
এই জোঁৰ সমদলত মহন্তৰ লগতে অগপৰ জিলা সম্পাদক নিৰঞ্জন বৰা, উৰিয়াগাঁও আঞ্চলিক সমিতিৰ সভাপতি তোষেশ্বৰ কলিতা, সম্পাদক লীলা শৰ্মা, দলটোৰ যুৱ সংগঠন যুৱ পৰিষদৰ জিলা সম্পাদক ৰঞ্জন বৰা, বঢ়মপুৰ সমষ্টিৰ অগপৰ নেতা-কৰ্মীসকলেও অংশ গ্ৰহণ কৰে।
