হিন্দু বাংলাদেশীক নাগৰিকত্ব প্ৰদানৰ ব্যৱস্থা ৰখা নাগৰিকত্ব সংশোধনী বিধেয়কখন বাতিলৰ দাবীত শুকুৰবাৰে নতুন দিল্লীৰ সংসদ মাৰ্গত দিনৰ প্ৰায় দহ বজাৰ পৰা বাৰ বজালৈকে নৰ্থ-ইষ্ট উইমেন্ছ ফ্ৰণ্টৰ উদ্যোগত এক প্ৰতিবাদী কাৰ্যসূচী ৰূপায়ন কৰা হয়।
প্ৰতিবাদী কাৰ্যসূচীৰ লগতে বিধেয়কখনৰ বিৰোধিতা কৰি এক গণ স্বাক্ষৰ অভিযান চলাই শীঘ্ৰে বিধেয়কখন বাতিল কৰাৰ বাবে নৰ্থ-ইষ্ট উইমেন্ছ ফ্ৰণ্টে প্ৰধানমন্ত্ৰী আৰু কেন্দ্ৰীয় গৃহ মন্ত্ৰীলৈ এখন স্মাৰক-পত্ৰও প্ৰেৰণ কৰে।
প্ৰতিবাদী কাৰ্যসূচীত অংশগ্ৰহণকাৰীসকলে নাগৰিকত্ব সংশোধনী বিধেয়ক বাতিল কৰক, অসমক ৰক্ষা কৰক আদি বিভিন্ন শ্ল’গান দি প্ৰতিবাদকাৰীসকলে হিন্দু বাংলাদেশীক নাগৰিকত্ব প্ৰদান কৰিব খোজা কেন্দ্ৰৰ বিজেপি চৰকাৰখনক তীব্ৰ ভাষাৰে সমালোচনা কৰে।
প্ৰতিবাদী কাৰ্যসূচীত অংশগ্ৰহণ কৰা নৰ্থ-ইষ্ট উইমেন্ছ ফ্ৰণ্টৰ সভানেত্ৰী তথা প্ৰাক্তন মন্ত্ৰী ৰেখাৰাণী দাস বড়োৱে নাগৰিকত্ব সংশোধনী বিধেয়কখনৰ তীব্ৰ বিৰোধিতা কৰি কয় যে যিখন বিধেয়কে আমাৰ মাতৃভূমিৰ স্বাৰ্থ ৰক্ষা নকৰে, মাতৃভাষা ৰক্ষা নকৰে, ৰাজনৈতিক অধিকাৰ তথা অৰ্থনৈতিক অধিকাৰ কাঢ়ি লৈ যায়, তেনে এখন বিধেয়কক আমি কোনো কাৰণতেই সমৰ্থন নজনাওঁ।
বিধেয়কখনৰ বিৰোধিতাত ৰাজ্য চৰকাৰক কঠোৰ স্থিতি গ্ৰহণ কৰিবলৈ দাবী উত্থাপন কৰি তেওঁ লগতে কয় যে মুখ্যমন্ত্ৰী সৰ্বানন্দ সোণোৱালৰ জাতি প্ৰেমৰ প্ৰতি আমাৰ অকণো সন্দেহ নাই। অনাগত দিনত অনুষ্ঠিত হ’বলগীয়া কেবিনেট বৈঠকত বিধেয়কখনৰ বিৰোধিতা কৰি এটা সিদ্ধান্ত ল’বলৈকো তেওঁ মুখ্যমন্ত্ৰীক আহ্বান জনায়।
আনহাতে, অসমৰ ৰাইজৰ দাবীক মানি ল’লেহে মুখ্যমন্ত্ৰী সৰ্বানন্দ সোণোৱাল জাতীয় নায়ক হৈ থাকিব বুলি উল্লেখ কৰি দাসে কয় যে বিধেয়কখনৰ বিৰোধিতা কৰি সোণোৱালে ৰাইজৰ পক্ষ লওঁক।
আনহাতে, প্ৰতিবাদী কাৰ্যসূচীত অংশগ্ৰহণ কৰা বিজেপিৰ নেত্ৰী মীৰা বৰঠাকুৰে কয় যে ৰাজনীতিতকৈ ৰাইজৰ স্বাৰ্থ আগত। আমি নিজৰ স্বাৰ্থ পূৰণৰ বাবে ৰাজনীতি কৰা নাই। সেয়েহে ৰাইজৰ পক্ষত থাকি আজি মই ৰাজপথলৈ ওলাই আহিছোঁ। ৰাজনীতিক ব্যৱসায় হিচাপে কেতিয়াও গ্ৰহণ কৰা নাই বুলি জনাই তেওঁ স্পষ্টভাৱে কয় যে নাগৰিকত্ব সংশোধনী বিধেয়কখনৰ বিৰোধিতাৰে আৰম্ভ কৰা এই গণ আন্দোলন আমি দেশৰ ৰাজধানীলৈ উলিয়াই আনিছোঁ।
এতিয়া জাতীয় নায়ক মুখ্যমন্ত্ৰী সৰ্বানন্দ সোণোৱালে বিধেয়কখনৰ বিৰোধিতাৰে কঠোৰ স্থিতি গ্ৰহণ কৰিলেই হ’ল। বিধেয়কখনক লৈ ৰাজনীতি নকৰিবলৈ আহ্বান জনাই তেওঁ লগতে কয় যে ৰাইজ আজি অশান্ত,মুখ্যমন্ত্ৰী সৰ্বানন্দ সোণোৱালে ৰাইজক এতিয়া আনন্দ দিয়ক। অন্যথা ইতিহাসৰ পাতত সোণোৱালৰ নাম জাতীয় নায়ক হিচাপে নহয়, এজন কলংকিত নায়ক হিচাপেহে ৰৈ যাব বুলি মত ব্যক্ত কৰে বিজেপিৰ নেত্ৰীগৰাৰীয়ে।
