অসমৰ অস্তিত্বৰ প্ৰতি ভাবুকি কঢ়িয়াই অনা নাগৰিকত্ব সংশোধনী বিধেয়ক ২০১৬ বাতিলৰ দাবীত আজি বৰপেটা চহৰত জিলা কংগ্ৰেছৰ উদ্যোগত গণ প্ৰতিবাদ আৰু স্মাৰক পত্ৰ প্ৰদান কাৰ্যসূচী ৰূপায়ণ কৰা হয়।
এই প্ৰতিবাদী কাৰ্যসূচী উপলক্ষে বৰপেটা ৰাজীৱ ভৱনৰ পৰা দিনৰ প্ৰায় ১২ বজাত কংগ্ৰেছ কৰ্মীসকলে এক সমদল উলিয়ায়। চহৰখনৰ মুখ্য পথেৰে সমদল কৰি প্ৰতিবাদী কংগ্ৰেছ কৰ্মীসকলে বৰপেটাৰ উপায়ুক্তৰ কাৰ্যালয়ৰ সমীপত উপস্থিত হয়।
সমদলত অংশ গ্ৰহণ কৰা শতাধিক প্ৰতিবাদী কংগ্ৰেছ কৰ্মীয়ে ‘জাতি মাটি দেশ, হ’বলৈ নিদিও শেষ’, ‘বাংলাদেশীক সংস্থাপন দিয়া কুটিল ৰাজনীতি বন্ধ কৰক’, ‘নাগৰিকত্ব সংশোধনী বিধেয়ক বাতিল কৰিবই লাগিব’, ‘ধৰ্মৰ নামত ৰাজনীতি নচলিব’, ‘অসম চুক্তি অৱমাননা কৰা নচলিব’, ‘ধৰ্মনিৰপেক্ষ ভাৰতক কলুষিত নকৰিব’, আদি শ্লোগান দিয়ে।
প্ৰতিবাদৰ অন্তত সমদলকাৰী কংগ্ৰেছ কৰ্মীসকলে বিধেয়কখনৰ প্ৰত্যাহাৰৰ দাবীত উপায়ুক্তৰ জৰিয়তে যুটীয়া সংসদীয় সমিতিৰ অধ্যক্ষলৈ এখন স্মাৰকপত্ৰ প্ৰেৰণ কৰে।
আজিৰ এই প্ৰতিবাদী কাৰ্যসূচীত জিলা কংগ্ৰেছৰ সভাপতি শান্তনু শৰ্মা, প্ৰাক্তন মন্ত্ৰী শুকুৰ আলী আহমেদ, বিধায়ক জাকিৰ হুছেইন শিকদাৰ, মহিলা কংগ্ৰেছৰ সভানেত্ৰী অঞ্জুৱাৰা বেগমৰ লগতে বিভিন্ন ব্লক কংগ্ৰেছৰ সভাপতি, সম্পাদকৰ উপৰি দলৰ কৰ্মীসকলে অংশগ্ৰহণ কৰে।
