অলপতে দক্ষিণ শালমাৰা- মানকাচৰ জিলাৰ ৰাইজ-দল-সংগঠনে মানকাচৰ বিদ্যুৎ উপ সংমণ্ডলৰ অনিয়মীয়া বিদ্যুৎ যোগানৰ প্ৰতিবাদত ১২ ঘণ্টীয়া বন্ধ পালন কৰাৰ পাছত কালি মানকাচৰ চহৰত নিয়মীয়া বিদ্যুৎ যোগানৰ দাবীত এটা প্রতিবাদী সমদল উলিওৱা হয়।
প্ৰায় শতাধিক লোকে মানকাচৰ অশোকাষ্টমী মেলা ময়দানৰ পৰা মানকাচৰ বিদ্যুৎ উপ-সংমণ্ডলৰ কার্যালয়লৈ এক প্রতিবাদী সমদল উলিয়ায় ব্যাপক প্ৰতিবাদ সাব্যস্ত কৰে৷
উল্লেখযোগ্য যে বিগত কেইটামান মাহ মানকাচৰ চহৰকে ধৰি জিলাখনৰ প্রতিটো অঞ্চলত দিনৰ দুইৰ পৰা চাৰিঘণ্টাহে বিদ্যুৎ যোগান ধৰি আহিছে মানকাচৰ বিদ্যুত বিভাগে৷ এফালে অনিয়মীয়া বিদ্যুৎ যোগান, আনফালে গ্রাহকৰ পৰা অত্যধিক বিল আদায় কৰি অহাৰ উপৰি গ্রাহকক হাৰাশাস্তি কৰি অহা মানকাচৰ বিদ্যুৎ বিভাগৰ বিৰুদ্ধে ৰাইজে প্রতিবাদ সাব্যস্ত কৰা গুৰুত্বপূৰ্ণ৷
প্ৰতিবাদী সমদলটোৱে বিভিন্ন শ্ল’গানেৰে মানকাচৰ চহৰৰ মূল মূল পথসমূহ পৰিভ্রমণ কৰি মানকাচৰ চহৰৰ পৰিৱেশ উত্তাল কৰি তোলে৷ আনহাতে প্রতিবাদী সমদলটো দুপৰীয়া একমান বজাত উপস্থিত হয় মানকাচৰ বিদ্যুৎ উপ-সংমণ্ডলৰ কার্যালয়ত৷ মানকাচৰ বিদ্যুৎ বিভাগৰ কার্যালয়টো প্রতিবাদকাৰীয়ে ঘেৰাও কৰি শ্ল’গানেৰে কার্যালয় চৌহদৰ আকাশ- বতাহ উত্তাল কৰি তোলে৷
প্রতিবাদকাৰীসকলে প্রতিবাদ কৰি থকাৰ সময়তে মানকাচৰ ৰাজহ চক্র বিষয়া আৰু বিদ্যুৎ বিভাগৰ এছডিঅ’ গৰাকীৰ লগতে মানকাচৰ আৰক্ষীৰ দল এটা ঘটনাস্থলীত উপস্থিত হয়৷ পাছত যুৱ নেতা ৰুকুমুজ্জামান আৰু ৰাইজে এখন স্মাৰক-পত্র চক্র বিষয়াগৰাকীৰ জৰিয়তে জিলা উপায়ুক্তলৈ প্ৰেৰণ কৰে৷
প্রতিবাদস্থালীত উপস্থিত হোৱা বিদ্যুৎ বিভাগৰ এছডিঅ’ গৰাকীৰ মতে জিলাখনত প্রায় ১২ মেগাৱাট বিদ্যুতৰ প্রয়োজন, কিন্তু তেওঁলোকে মাত্র দুই, তিনি আৰু খুব বেছি চাৰি মেগাৱাট বিদ্যুতহে চৰকাৰৰ পৰা লাভ কৰে৷ ফলত ভল্টেজৰ সমস্যাকে ধৰি বিদ্যুৎ যোগান অনিয়মীয়া হৈ আছে৷ এই ক্ষেত্রত তেওঁ অসম চৰকাৰক জিলাখনত বিদ্যুৎ ব্যৱস্থা নিয়মীয়া কৰাৰ অনুৰোধ জনাব বুলি প্রতিবাদকাৰীসকলক প্ৰতিশ্ৰুতি দিয়ে।
