অসম চৰকাৰৰ সাংস্কৃতিক সঞ্চালকালয়ৰ উদ্যোগত আৰু কামৰূপ মহানগৰ জিলা প্ৰশাসনৰ সহযোগত সোণাপুৰ মিনি ষ্টেডিয়ামত কেন্দ্ৰীয়ভাৱে বিষ্ণু ৰাভা দিৱসৰ আয়োজন কৰা হয়। এই অনুষ্ঠানতে উপস্থিত থাকি মুখ্যমন্ত্ৰী সৰ্বানন্দ সোণোৱালে প্ৰসিদ্ধ ভাষ্কৰ্য শিল্পী ড০ জনক ঝংকাৰ নাৰ্জাৰী আৰু বিশিষ্ট নৃত্যশিল্পী গুণেশ্বৰ ভূঞাক ২০১৮ বৰ্ষৰ বিষ্ণু ৰাভা বঁটা প্ৰদান কৰে।
বঁটা প্ৰাপকসকলক ২ লাখ টকাৰ চেকৰ লগতে একোখনকৈ প্ৰশস্তি পত্ৰ, শৰাই আৰু অংগবস্ত্ৰ প্ৰদান কৰা হয়।
অনুষ্ঠানত মুখ্যমন্ত্ৰী সৰ্বানন্দ সোণোৱালৰ উপৰি মন্ত্ৰী নৱ কুমাৰ দলে, বিধায়ক অতুল বৰা, ৰমেন্দ্ৰ নাৰায়ণ কলিতা, সাংসদ প্ৰদান বৰুৱাকে ধৰি বহুসংখ্যক গণ্য–মান্য ব্যক্তি উপস্থিত থাকে।
অনুষ্ঠানত ভাষণ প্ৰদান কৰি মুখ্যমন্ত্ৰী সোণোৱালে কলাগুৰুৰ আদৰ্শেৰে অনুপ্ৰাণিত হৈ নৱ প্ৰজন্মক কঠোৰ পৰিশ্ৰম, সাধনা আৰু মানৱীয় প্ৰমুল্যবোধেৰে উদ্বুদ্ধ কৰিবলৈ অভিভাৱক আৰু শিক্ষক-শিক্ষয়িত্ৰীসকলক আহ্বান জনায়। সোণোৱালে কয় যে বিষ্ণু ৰাভাই সমাজখন শক্তিশালীভাৱে কেনেদৰে নিৰ্মাণ কৰিব পাৰি তাৰ দৃষ্টান্ত দেখুৱাই গৈছে।
উঠি অহা প্ৰজন্মই জাতীয় ঐতিহ্যৰ প্ৰতি শ্ৰদ্ধা প্ৰদৰ্শন কৰি ভৱিষ্যতৰ বাবে শক্তিশালী মানৱীয় প্ৰমূল্যৰ পৰম্পৰা সমাজত প্ৰতিষ্ঠা কৰিব লাগিব আৰু শান্তি-সম্প্ৰীতি, ভাতৃত্ববোধ তথা বন্ধুত্ব অধিক সুদৃঢ় কৰিবৰ বাবে কলাগুৰুৰ আদৰ্শেৰে আগুৱাই যাব লাগিব বুলি কয় মুখ্যমন্ত্ৰী সোণোৱালে।
‘আমি কি কৰি আছো আপোনালোকে নজৰ ৰাখক। দুৰ্নীতিত যাতে কোনো জড়িত হ’ব নোৱাৰে তাৰ ওপৰত চকু দিয়ক,‘-মুখ্যমন্ত্ৰীয়ে ৰাইজক এইদৰে আহ্বান জনায়।
কলাগুৰুক সকলোৰে হৃদয়ত জীয়াই ৰাখিবলৈ আহ্বান জনাই মুখ্যমন্ত্ৰীয়ে কয় যে বিষ্ণু ৰাভাই সমাজৰ বিভিন্ন শ্ৰেণীৰ মাজৰ বৈষম্য আঁতৰাই সমতা প্ৰতিষ্ঠা কৰাৰ সপোন দেখিছিল আৰু সাংস্কৃতিক বিপ্লৱৰ জৰিয়তে এই কাম সম্ভৱ কৰিবলৈ প্ৰয়াস কৰিছিল।
একবিংশ শতিকাৰ বিজ্ঞান প্ৰযুক্তিবিদ্যাৰ যুগত অন্ধবিশ্বাস আৰু কু-সংস্কাৰে সমাজত সৃষ্টি কৰা সমস্যাৰ কথা উল্লেখ কৰি মুখ্যমন্ত্ৰী সোণোৱালে কয় যে বৈজ্ঞানিক দৃষ্টিভংগীৰে আগবাঢ়িলে এই অন্ধবিশ্বাস সমূহ সমাজৰ পৰা আঁতৰ কৰা সম্ভৱ।
উল্লেখযোগ্য যে আজিৰ এই অনুষ্ঠানতে মুখ্যমন্ত্ৰী সোণোৱালে ৰাজ্যখনৰ শৈক্ষিক, সামাজিক আৰু সাংস্কৃতিক জীৱনলৈ বিশেষ বৰঙণি আগবঢ়োৱা সোণাপুৰ অঞ্চলৰ ১০ গৰাকী বিশিষ্ট ব্যক্তিক সম্বৰ্দ্ধনা জ্ঞাপন কৰে।
