ওৰাং বনাঞ্চলিক বিষয়াৰ নেতৃত্বৰ এটা অভিযানকাৰী দল আজি ওৰাং ৰাষ্ট্ৰীয় উদ্যানখনৰ পৰা চাৰিজনকৈ চোৰাংচিকাৰীক ধৰিবলৈ সক্ষম হৈছে। লগতে চোৰাংচিকাৰীকেইজনে এটা বাঘ হত্যা কৰি তাৰ ছাল আৰু হাড় লুকুৱাই থোৱা অৱস্থাৰ পৰা উদ্ধাৰ কৰে।
বনাঞ্চলিক বিষয়াজনে জনোৱা মতে, এই চোৰাংচিকাৰীকেইজন ৰাষ্ট্ৰীয় উদ্যানকেইখনৰ কেইবাটাও বাঘ হত্যাৰ সৈতে জড়িত।
ধৃত চোৰাংচিকাৰীকেইজনৰ নাম হ’ল ক্ৰমে আব্দুল কাছেম, জিয়াবুৰ ৰহমান, ৰাফুল আহমেদ আৰু আইজুল ইচলাম। আটাইকেইজন শোণিতপুৰ জিলাৰ ঢেকীয়াজুলিৰ বুলি জানিব পৰা গৈছে।
বন বিষয়াকেইজনে জনোৱামতে চোৰাংচিকাৰীকেইজনক তেজপুৰৰ আদালতত হাজিৰ কৰোৱা হয়। ইতিপূৰ্বে বাঘ চিকাৰত জড়িত আন দুজন চোৰাং চিকাৰীক জেইললৈ পঠোৱা হৈছিল।
সূত্ৰটোৱে জনোৱামতে, এই চোৰাংচিকাৰীৰ দলটোৱে বিগত বহু দিন ধৰি ৰাষ্ট্ৰীয় উদ্যানখনত বাঘ চিকাৰ কৰি তাৰ ছাল, হাড় আদি চোৰাং বজাৰত বিক্ৰী কৰি আহিছিল।
