অসমৰ পৰা অবৈধ বাংলাদেশীক বহিস্কাৰ কৰিবলৈ ভাৰত চৰকাৰে বাংলাদেশৰ সৈতে শীঘ্ৰেই এখন চুক্তি সম্পাদন কৰিব লাগে বুলি দাবী তুলিছে সদৌ অসম ছাত্ৰ সন্থাই। আনহাতে, কেন্দ্ৰীয় গৃহ ৰাজ্যমন্ত্ৰী কিৰেন ৰিজিজুৱে ইতিমধ্যে বাংলাদেশী বহিস্কাৰৰ বাবে চুক্তিৰ প্ৰয়োজন নাই বুলি কৈছিল।
ৰিজিজুৱে বাংলাদেশী বহিস্কাৰৰ ক্ষেত্ৰত ৰাজ্য চৰকাৰক সম্পূৰ্ণ কৰ্তৃত্ব দিয়া হৈছে বুলিও কৈছিল। গতিকে প্ৰত্যৰ্পণ চুক্তিৰ প্ৰয়োজন নহ’লে প্ৰচলিত আইনৰ আধাৰতে অবৈধ বাংলাদেশী বহিস্কাৰৰ শক্তিশালী প্ৰশাসনীয় ব্যৱস্থা গ্ৰহণ কৰিব লাগে।
সদৌ অসম ছাত্ৰ সন্থাৰ সভাপতি দীপাংক কুমাৰ নাথ আৰু সাধাৰণ সম্পাদক লুৰিণজ্যোতি গগৈয়ে এটা বিবৃতিত লগতে কয় যে ৰাষ্ট্ৰীয় নাগৰিক পঞ্জী সম্পৰ্কে বাংলাদেশৰ প্ৰধানমন্ত্ৰী শ্বেখ হাছিনাৰ মন্তৱ্য অবাঞ্চনীয়।
আছুৱে কয় যে ভাৰত এখন সাৰ্বভৌম দেশ। আমাৰ দেশৰ নিজৰ সংবিধান আছে। স্বাধীনতাৰ পিছৰে পৰা তেতিয়াৰ পূব পাকিস্তান তথা বৰ্তমানৰ বাংলাদেশৰ পৰা অবিৰতভাৱে ঘটা অবৈধ বিদেশীৰ প্ৰব্ৰজনে অসমৰ জনগাঁথনি সলনি কৰিছে। অসমৰ খিলঞ্জীয়া মানুহৰ পৰিচয় সংকটত পৰিছে।
সন্থাই লগতে উনুকিয়াই দিয়ে যে এই বিষয়টোক লৈয়েই বিশ্ববিখ্যাত অসম আন্দোলন আৰম্ভ হৈছিল আৰু ঐতিহাসিক অসম চুক্তি সম্পাদিত হৈছিল।
অসম চুক্তি অনুসৰি বৰ্তমান নাগৰিক পঞ্জী উন্নীতকৰণৰ কাম চলি আছে। উচ্চতম ন্যায়ালয়ৰ নিৰ্দেশ আৰু তদাৰকীত নাগৰিক পঞ্জীৰ কাম চলি আছে। এনে সময়তে বাংলাদেশৰ প্ৰধানমন্ত্ৰী হাছিনাৰ বক্তৱ্য হস্তক্ষেপৰ বাহিৰে একো নহয়। হাছিনাৰ মন্তৱ্যই দেশৰ উচ্চতম ন্যায়ালয়কো অৱমাননা কৰিছে বুলি কয় ছাত্ৰ সংগঠনটোৱে।
উচ্চতম ন্যায়ালয়ৰ তদাৰকত চলি থকা অসমৰ নাগৰিকপঞ্জী উন্নীতকৰণক লৈ বাংলাদেশৰ প্ৰধানমন্ত্ৰী হাছিনা শংকিত হোৱাটোৱে আকৌ এবাৰ অসম আন্দোলন আৰু অসম চুক্তিৰ তাৎপৰ্য প্ৰতিপন্ন কৰিলে বুলি সংগঠনটোৱে প্ৰকাশ কৰে।
বিবৃতিত কোৱা হৈছে যে প্ৰধানমন্ত্ৰী শ্বেখ হাছিনাৰ পিতৃ শ্বেখ মজিবুৰ ৰহমান বাংলাদেশৰ প্ৰথমজন প্ৰধানমন্ত্ৰী আছিল। দায়িত্বভাৰ গ্ৰহণ কৰিয়েই ৰহমানে সেই সময়ৰ ভাৰতৰ প্ৰধানমন্ত্ৰীক প্ৰতিশ্ৰুতি দিছিল যে ১৯৭১ চনৰ ২৫ মাৰ্চৰ পিছত অসমত প্ৰৱেশ কৰা সকলো লোককে বাংলাদেশে ঘুৰাই ল’ব।
আছুৱে দাবী কৰে যে পিতৃৰ প্ৰতিশ্ৰুতিৰ ৰক্ষা কৰি হাছিনাই প্ৰতিজন অবৈধ বাংলাদেশীক ঘুৰাই লোৱাৰ ব্যৱস্থা গ্ৰহণ কৰক। বিবৃতিটোত কোৱা হৈছে যে অসম চুক্তি অনুসৰি অবৈধ বাংলাদেশী বহিস্কাৰৰ দায়িত্ব কেন্দ্ৰীয় চৰকাৰৰ। সেয়েহে বহিস্কৰণৰ পথ প্ৰশস্ত কৰিবলৈ ভাৰত চৰকাৰে শ্বেখ হাছিনাৰ লগত আলোচনা কৰা উচিত।
