মুখ্য মন্ত্ৰী সৰ্বানন্দ সোণোৱালে গুৱাহাটীক ‘ভাৰতৰ ক্ৰীড়া ৰাজধানী’ কৰি তুলিবলৈ সৰ্বপ্ৰচেষ্টা চলাই অহাৰ পৰতে অসমৰ এখন উৎকৃষ্ট খেলপথাৰ ‘ধ্বংস’ কৰাৰ অভিযোগত অভিযুক্ত হৈছে শাসনাধিষ্ঠ বিজেপি।
গুৱাহাটীৰ খানাপাৰাৰ অসম পশু চিকিৎসা মহাবিদ্যালয় খেলপথাৰ ধ্বংস কৰাৰ বাবে জগৰীয়া বিজেপি আৰু কামৰূপ (মঃ) জিলা প্ৰশাসন। এক আৰ টি আই আবেদনৰ উত্তৰত অসম কৃষি বিশ্ববিদ্যালয়ৰ ছাত্ৰ কল্যাণ বিভাগৰ সহযোগী সঞ্চালক ৰঞ্জিত নেওগে এই অভিযোগ আনিছে।
যোৱা ৫ বছৰত বৃহৎ ৰাজনৈতিক সমাৱেশ, প্ৰদৰ্শনী আৰু ক্ৰীড়াৰ লগত সম্পৰ্ক নথকা আন আন কাৰ্য্যকলাপৰ থলীত পৰিণত হৈছে গুৱাহাটী মহানগৰৰ দক্ষিণ প্ৰান্তৰ সুদৃশ্য বহুমুখী ক্ৰীড়া প্ৰকল্পটো।
নেওগে জনাই ক্ৰীড়া প্ৰকল্পটোত যোৱা ২০১১ চনৰ মে’ত আৰম্ভ কৰা যুৰীয়া ক্ৰিকেট পিত্চখন ‘বিজেপিৰ অসম প্ৰদেশে মাটিৰে পুতি পেলোৱাৰ ফলত’ বৰ্তমান আৰু ই খেলিব পৰা অৱস্থাত নাই। ক্ৰিকেটৰ প্ৰসাৰৰ বাবে অভিজ্ঞ ক্যুৰেটৰৰ তত্বাৱধানত এই পিত্চখন প্ৰস্তুত কৰা হৈছিল।
কৃষি বিশ্ববিদ্যালয়ৰ সহযোগী সঞ্চালকজনে কয় যে যোৱা ২০১৭ চনৰ মে’ত কেন্দ্ৰৰ এন ডি এ’ চৰকাৰৰ তৃতীয় তথা অসমৰ বিজেপি চৰকাৰৰ প্ৰথম বৰ্ষপূৰ্তি অনুষ্ঠানত ভাগ ল’বলৈ অহা প্ৰধান মন্ত্ৰী নৰেন্দ্ৰ মোদীৰ ভ্ৰমণৰ সময়ত বিজেপিয়ে ক্ৰিকেট পিত্চখন মাটিৰে পুতি পেলাইছিল।
৪৬.৬০ বিঘা এলেকাজুৰি পশু চিকিৎসা মহাবিদ্যালয়ত থকা বহুমুখী ক্ৰীড়া প্ৰকল্পটোলৈ চাৰিওফালৰ পৰা প্ৰৱেশ কৰিব পৰাকৈ পথ আছে। বিভিন্ন ক্ৰীড়াৰ বিকাশৰ বাবে ১৯৭৭ চনত ইয়াক স্থাপন কৰা হৈছিল।
ফুটবল, ক্ৰিকেট, লন টেনিছ, বাস্কেট বল আৰু ভলি বলৰ লগতে এই খেলপথাৰত অশ্বচালনকে ধৰি ঘোঁৰা চালনাৰ অন্যান্য বিভিন্ন খেলৰ প্ৰশিক্ষণৰো ব্যৱস্থা আছে।
ৰাজনৈতিক দলবোৰৰ কাৰ্য্যসূচীসমূহৰ পূৰ্বে নিজৰ খেলপথাৰৰ পৰাই চিকিৎসা মহাবিদ্যালয়ৰ ছাত্ৰ-ছাত্ৰীসকলক খেদাই পঠোৱা হয় বুলি তেওঁলোকে অভিযোগ কৰে। আনকি এই বছৰৰ ২০ আৰু ২১ জানুৱাৰিত আৰ এচ এচৰ ‘লুইতপৰীয়া হিন্দু সমাৱেশ’ৰ এদিন আগতে খেলপথাৰখনত খোজ কাঢ়িবলৈ যোৱা কৃষি বিশ্ববিদ্যালয়ৰ এজন জ্যেষ্ঠ অধ্যাপককো আনকি আৰক্ষীয়ে খেদাই পঠোৱাৰ দৰে অভিযোগো আছে।
ক্ৰীড়াৰ লগত সম্পৰ্ক নথকা এনে কাৰ্য্যসূচীসমূহৰ আয়োজনকালত খেলপথাৰখনত দেখা যায় ট্ৰাককে ধৰি বিভিন্ন গধূৰ যান-বাহন যিবোৰে অসম কৃষি বিশ্ববিদ্যালয়ে যোৱা ৪ দশকজুৰি সযত্নে ৰক্ষা কৰি অহা উচ্চমানৰ ঘাঁহৰ দলিচাখন নষ্ট কৰি পেলালে।
ফুটবল খেলুৱৈসকলে অভিযোগ কৰে যে খেলপথাৰখন এতিয়া ইমান কঠিন হৈ পৰিল যে তেওঁলোকৰ বুটজোটাৰ প্লাষ্টিক স্পাইকেৰে ইয়াত খেলিবলৈ খোপনি ল’ব নোৱাৰি। তাৰোপৰি সমাৱেশসমূহৰ আয়োজকে এৰি যোৱা গঁজালৰ লগতে আন হূল-জেঙৰ পৰাও তেওঁলোক সাৱধান হ’ব লগা হয়।
ৰঞ্জিত নেওগে লগতে জনাই যে যোৱা লোকসভা নিৰ্বাচনৰ পূৰ্বে নৰেন্দ্ৰ মোদীৰ এক জনসভাৰ বাবে আইন-শৃংখলাৰ ব্যৱস্থা কৰিবলৈ ক্ৰীড়া প্ৰকল্পটোৰ সীমাৰ দেৱাল ভাঙি দিবলৈ যোৱা ২০১৪ চনৰ ফেব্ৰুৱাৰিত দিচপুৰ ৰাজহ চক্ৰৰ বিষয়াই নিৰ্দেশ দিছিল।
প্ৰতিশ্ৰুতি অনুসৰি দেৱালৰ সেই ভঙা অংশসমূহ বিজেপিৰ অসম প্ৰদেশে ঠিক কৰাৰ কথা আছিল বুলি উল্লেখ কৰি নেওগে জনাই যে দেৱালবোৰ ভঙাৰ চাৰি বছৰ উকলি যোৱাৰ পিছতো আজিপৰ্য্যন্ত এইসমূহ পুনৰ্নিৰ্মাণ কৰা নহ’ল।
‘অসম কৃষি বিশ্ববিদ্যালয়ৰ কোনো বিষয়াই কোনো সংগঠনকে এই দেৱালসমূহ ভাঙিবলৈ কৰ্তৃত্ব দিয়া নাছিল আৰু কোনো সংগঠনে বিশ্ববিদ্যালয়ক কোনো ক্ষতিপূৰণ দিয়া নাই,’ বুলি উল্লেখ কৰি নেওগে জনায় যে অতি শীঘ্ৰে এই ভঙা দেৱালসমূহ নিৰ্মাণ কৰি দিবলৈ বিজেপিৰ সৈতে যোগাযোগ চলাই থকা হৈছে।
বিশ্ববিদ্যালয়ৰ বিষয়াজনে লগতে জনাই ভিভিআইপিৰ মসৃণ অৱৰোহণৰ বাবে অস্থায়ী হেলিপেদ তৈয়াৰ কৰিবলৈ কামৰূপ জিলা প্ৰশাসনে খেলপথাৰখনৰ পশ্চিম অংশৰ বহুঠাইত ৯১১৩০টা পকী ব্লক স্থাপন কৰিছিল। এই পকী ব্লকসমূহেৰে খেলপথাৰখনৰ প্ৰায় ১৯৩৮.৯৪ বৰ্গ মিটাৰ এলেকা ঢাকি পেলোৱা হ’ল।
এই কামটো অসমৰ গড়কাপ্তানি বিভাগে কৰা বুলি উল্লেখ কৰি নেওগে কয় ‘ক্ৰীড়া প্ৰকল্পটোত এই ব্লকবোৰ স্থাপন কৰিবলৈ অসম কৃষি বিশ্ববিদ্যালয়ে কাকো কোনো ধৰণৰ অনুমতি প্ৰদান কৰা নাছিল।’
এই ব্লকসমূহ গুচাবৰ বাবে কৃষি বিশ্ববিদ্যালয়ৰ কোনো পৰিকল্পনা নাই বুলি সদৰী কৰি বিষয়াজনে জনাই যে এইবোৰ আঁতৰ কৰিবলৈ কমেও ১০ হাজাৰ টকাৰ প্ৰয়োজন হ’ব। তেওঁ জনাই যে এই ব্লকসমূহ গুচোৱাৰ খৰচ কামৰূপ (মঃ) জিলা প্ৰশাসনে বহন কৰিবনে নাই সেই সন্দৰ্ভত কৃষি বিশ্ববিদ্যালয় অৱগত নহয়।
পশু চিকিৎসা মহাবিদ্যালয়ৰ প্ৰাক্তন ছাত্ৰ কাব্য জ্যোতি বৰাই নৰ্থ ইষ্ট নাও-ক বৃ্হস্পতিবাৰে কয় ‘শাসনাধিষ্ঠ চৰকাৰ আৰু কামৰূপ (মঃ) প্ৰশাসনে অসমৰ এখন উৎকৃষ্ট খেলপথাৰ সম্পূৰ্ণৰূপে ধ্বংস কৰাৰ দৰে কাম কৰাটো আশ্চৰ্য্যজনক।’
খেলপথাৰখন পুনৰ্নিমাণ যুদ্ধকালীন ক্ষীপ্ৰতাৰে কৰাৰ বাবে অসম বিজেপিৰ নেতৃত্বক ৰাজ্য চৰকাৰে শীঘ্ৰে জোৰ দিব লাগে বুলিও বিক্ষুব্ধ বৰাই দাবী কৰে।
‘গুৱাহাটীত মুকলি ঠাই নোহোৱা হৈ অহাৰ সময়ত অসম কৃষি বিশ্ববিদ্যালয়ে খানাপাৰাৰ ক্ৰীড়া প্ৰকল্পত খেলৰ সৈতে সম্পৰ্ক নথকা কোনো কাৰ্য্যসূচীৰ বাবে অনুমতি দিব নালাগে,’ তেওঁ কয়।
ৰাজনৈতিক সমাৱেশ বা প্ৰদৰ্শনীৰ বাবে গুৱাহাটীত ৰাজ্য চৰকাৰে বিকল্প স্থান চিনাক্ত কৰিব নোৱৰাটো আশ্চৰ্য্যকৰ। খানাপাৰাৰ খেলপথাৰখন ৰক্ষা কৰিবলৈ যদি চৰকাৰ সজাগ নহয়, গুৱাহাটীক ‘ভাৰতৰ ক্ৰীড়া ৰাজধানী’ কৰি তোলাৰ মুখ্য মন্ত্ৰীৰ সপোন অপূৰ্ণ সপোন হৈয়ে ৰ’ব।
