অসম গণ পৰিষদৰ তৃণমূল পৰ্যায়ৰ নেতা-কৰ্মীসকলে ভাৰতীয় জনতা পাৰ্টী চমুকৈ বিজেপিৰ সৈতে মিত্ৰতা প্ৰত্যাহাৰ কৰি আগন্তুক পঞ্চায়ত নিৰ্বাচন আৰু লোকসভা নিৰ্বাচনত দলে অকলে প্ৰতিদ্বণ্ডিতা কৰাৰ পোষকতা কৰি থকাৰ সময়তে মঙলবাৰে বিজেপিৰ সভাপতি ৰঞ্জিত দাসে মিত্ৰতা সন্দৰ্ভত কৰা মন্তব্যই স্বাভাৱিকতে অগপৰ দলীয় নেতা-কৰ্মীক অস্বস্তিত পেলোৱা পৰিলক্ষিত হৈছে।
মঙলবাৰে এক সংবাদমেলত বিজেপিৰ সভাপতি ৰঞ্জিত দাসে আগন্তুক পঞ্চায়ত আৰু লোকসভা নিৰ্বাচনৰ সময়লৈকে অগপৰ সৈতে মিত্ৰতা থাকিব বুলি এক ইংগিত দিছিল। তাৰোপৰি যোৱা মাৰ্চ মাহত অসমলৈ অহা বিজেপিৰ ৰাষ্ট্ৰীয় অধ্যক্ষ অমিত শ্বাহেও অগপ-বিপিএফৰ সৈতে একেলগে পঞ্চায়ত আৰু লোকসভা নিৰ্বাচন খেলিম বুলি মন্তব্য কৰিছিল।
ইফালে ৰঞ্জিত দাসে কৰা মন্তব্য সন্দৰ্ভত অতি কৌশলগত স্থিতি অৱলম্বন কৰি অগপৰ কেন্দ্ৰীয় উপ-সভাপতি তথা পাটাছাৰকুছি সমষ্টিৰ বিধায়ক পবিন্দ্ৰ ডেকাই কয় ‘বিজেপিৰ সৈতে অগপৰ মিত্ৰতা যোৱা বিধানসভা নিৰ্বাচনলৈহে আছিল। কিন্তু আগন্তুক পঞ্চায়ত নিৰ্বাচন আৰু লোকসভা নিৰ্বাচনত বিজেপিৰ সৈতে অগপই মিত্ৰতা কৰা নকৰা সন্দৰ্ভত চূড়ান্ত সিদ্ধান্ত অগপৰ সাধাৰণ পৰিষদে গ্ৰহণ কৰিব’।
উল্লেখ্য যে মঙলবাৰে টিহুত অনুষ্ঠিত হোৱা এখন দলীয় সভাত বিধায়কজনে অংশগ্ৰহণ কৰি এইদৰে তাৎপৰ্যপূৰ্ণ মন্তব্য কৰা দেখা যায়।
অগপৰ টিহু জিলা পৰিষদৰ উদ্যোগত টিহুৰ মহাত্মা গান্ধী ভৱনত অনুষ্ঠিত হোৱা বৈঠকত দলটোৱে আগন্তুক পঞ্চায়ত নিৰ্বাচন সম্পৰ্কে বিস্তৃত আলোচনা কৰাৰ উপৰি নিৰ্বাচনলৈ সাজু বুলি উল্লেখ কৰাৰ লগতে ইতিমধ্যে প্ৰাৰ্থী নিৰ্বাচন প্ৰক্ৰিয়া আৰম্ভ কৰা বুলিও তেওঁ জানিবলৈ দিয়ে।
ইফালে সৰ্বত্ৰে প্ৰতিবাদ হৈ থকা জাতিধ্বংসী বিধেয়ক সন্দৰ্ভত কেন্দ্ৰীয় চৰকাৰে ঘোষণা কৰা সিদ্ধান্তত অসমৰ ৰাইজ তথা অগপ দল আশ্বস্ত হ’ব পৰা নাই বুলি বিধায়কগৰাকীয়ে স্পষ্ট ৰূপত উল্লেখ কৰে।
এতিয়া প্ৰশ্ন হ’ল অগপৰ বিভিন্ন জিলা সমিতিয়ে সাংগঠনিক ভেটি শক্তিশালী কৰি আগন্তুক পঞ্চায়ত নিৰ্বাচনত অকলে যুঁজ দিয়াৰ বাবে বিভিন্ন সভা-সমিতিৰ জৰিয়তে জনমত গঠন কৰি থকাৰ সময়ত যদিহে কেনেবাকৈ পুনৰ এবাৰ ৰাষ্ট্ৰীয় দল বিজেপিৰ সৈতে মিত্ৰতা কৰে নিঃসন্দেহে অসমত অগপই নিজৰ পৰিচয় হেৰুৱাটো খাটাং হৈ পৰিব বুলিও সভাত নেতা-কৰ্মীয়ে ভাষণ প্ৰদান কৰে।
অগপৰ টিহু জিলা পৰিষদৰ সভাপতি সুৰেন্দ্ৰ নাথ কলিতাৰ সভাপতিত্বত অনুষ্ঠিত হোৱা সভাত নলবাৰী জিলা অগপৰ সভাপতি আনন্দ ৰাজবংশী, সম্পাদকদ্বয় কেশৱ ডেকা, জ্যোতিষ ঠাকুৰীয়া, কেন্দ্ৰীয় কাৰ্যনিৰ্বাহক অকণমল্ল বৰুৱা আদিয়ে বিজেপি দলে কিদৰে অসমৰ পৰা আঞ্চলিক দল অগপক নিঃশেষ কৰাৰ পৰিকল্পনা ৰচিছে সেই সম্পৰ্কে ভাষণ প্ৰদান কৰে।
