বিজেপিৰ ‘দিনতেই, বিজেপি চৰকাৰ ক্ষমতালৈ অহাৰ পিছতে হিন্দু অবৈধ বাংলাদেশীসকলৰ মইমতালিতো অলপ বেছি বাঢ়িছে।’ বিজেপি চৰকাৰে সংসদত নাগৰিকত্ব আইন সংশোধনী বিধেয়ক গৃহীত কৰিবলৈ চেষ্টা কৰাৰ সময়তে হিন্দু বাংলাদেশীক লৈ আজি বৃহস্পতিবাৰে নৰ্থ ইষ্ট নাওৰ ওচৰত এইদৰে মন্তব্য কৰিছে আলফাৰ সাধাৰণ সম্পাদক অনুপ চেতিয়াই।
মুখ্য মন্ত্ৰী সৰ্বানন্দ সোণোৱালক সাক্ষাৎ কৰা সদৌ অসম বাঙালী যুৱ-ছাত্ৰ ফেডাৰে’চনৰ নেতা সুকুমাৰ বিশ্বাসে বুধবাৰে অসম বিধানসভাৰ বাহিৰত ‘হিন্দু বাংলাদেশীক নাগৰিকত্ব ১০০%ই দিবই লাগিব’ আৰু ইয়াৰ বিৰোধিতা কৰাৰ ‘অধিকাৰ অসমৰ কোনো সংগঠনৰে নাই’ বুলি কৰা মন্তব্যৰ প্ৰতিক্ৰিয়া কৰি আলফা নেতাজনে আজি এই মন্তব্য কৰে।
চৰকাৰক এই সন্দৰ্ভত কি আহ্বান জনাব বুলি সোধাত চেতিয়াই কয় যে চৰকাৰক কি আহ্বান জনাম? চৰকাৰেতো তেওঁলোকৰ পক্ষতেই মাত মাতি আছে।
হিন্দু বাংলাদেশীক ‘ৰক্ষণাৱেক্ষণ দিম বুলিয়েই’ চৰকাৰে ‘নাগৰিকত্ব সংশোধনী বিধেয়ক আনিছে’ আৰু সংসদত গৃহীত কৰিবলে ‘চেষ্টা কৰি আছে’ বুলি আলফা নেতাজনে অভিযোগ কৰে।
‘এজন অনুপ্ৰৱেশকাৰীয়ে’ তেওঁলোকক নাগৰিকত্ব দিবই লাগিব বুলি অসমৰ ৰাজধানীত ‘সগৌৰৱে ঘোষণা’ কৰাটোক ‘উদ্ভণ্ডালি’ বুলি আলফা নেতাজনে ‘ধিক্কাৰ’ দিয়ে আৰু ইয়াৰ ‘যোগ্য প্ৰত্যুত্তৰ দিয়াৰ বাবে সাজু হ’বলৈ অসমৰ সকলো খিলঞ্জীয়া জাতি-জনগোষ্ঠীক’ তেওঁ ‘আহ্বান’ জনায়।
অসমবিৰোধী চক্ৰক প্ৰতিৰোধ কৰাৰ বাবেই খিলঞ্জীয়া মঞ্চ, অসম গঠন কৰা বুলি উল্লেখ কৰি চেতিয়াই কয় যে এই চক্ৰৰ বিৰুদ্ধে অসমৰ খিলঞ্জীয়াসকল ঐক্যবদ্ধ হ’ব নোৱাৰিলে প্ৰতিৰোধ গঢ়ি তুলিব পৰা নাযাব।
গুৱাহাটীৰ কনকলাল বৰুৱা প্ৰেক্ষাগৃহত মটক জনগোষ্ঠীৰ নাগৰিক অভিৱৰ্তনত ভাগ লোৱাৰ পিছতে নৰ্থ ইষ্ট নাওৰ সৈতে হোৱা কথা-বতৰাত আলফা নেতাজনে এইদৰে মত প্ৰকাশ কৰে।
আনহাতে ‘অসমীয়াৰ স্বাৰ্থক নস্যাৎ কৰি কোনোবা বহিৰাগতই ইয়াত থিতাপি ল’বলৈ দিবই লাগিব বুলি দিয়া হুমকিক প্ৰতিহত কৰিবলৈ আমি যিকোনো ধৰণে সাজু আছো’ বুলি ঘোষণা কৰিছে সদৌ অসম মটক যুৱ-ছাত্ৰ সন্মিলনৰ উপদেষ্টা মিণ্টু বৰপাত্ৰই।
