ৰাষ্ট্ৰীয় আন্তঃস্কুল বেণ্ড প্ৰতিযোগিতাত ছিকিমৰ গেংটকস্থিত চাদাম চিনিয়ৰ চেকেণ্ডাৰি স্কুলে দ্বিতীয়স্থান দখল কৰি স্কুলখনৰ লগতে সমগ্ৰ ছিকিমবাসীক গৌৰৱাণ্বিত কৰিবলৈ সক্ষম হৈছে। নতুনদিল্লীত সোমবাৰে সৰ্বভাৰতীয় পৰ্যায়ত আন্তঃস্কুল বেণ্ড প্ৰতিযোগিতাখন অনুষ্ঠিত হৈছিল।
উল্লেখ্য যে ঝাৰখণ্ডে প্ৰতিযোগিতাখনৰ শ্ৰেষ্ঠ ৰূপে বিবেচিত হয়। সৰ্বভাৰতীয় পৰ্যায়ত অনুষ্ঠিত হোৱা প্ৰতিযোগিতাখনত ভাৰতৰ ৭টা মণ্ডলে অংশগ্ৰহণ কৰিছিল। য’ত উত্তৰ-পূবৰ ছিকিমৰ চাদাম চিনিয়ৰ চেকেণ্ডাৰি স্কুলে ল’ৰাৰ শাখাত প্ৰতিযোগিতাখনত অংশগ্ৰহণ কৰাৰ সুযোগ লাভ কৰি দ্বিতীয়স্থান দখল কৰিবলৈ সক্ষম হয়।
ছিকিমৰ স্কুলখনে নগদ ১৫০০০ হেজাৰ টকা পোৱাৰ বিপৰীতে বিজয়ী ঝাৰখণ্ডৰ স্কুলে ২০০০০ হেজাৰ টকা পুৰস্কাৰ হিচাপে গ্ৰহণ কৰে। উত্তৰ-পূবক প্ৰতিনিধিত্ব কৰা ছিকিমৰ স্কুলখনৰ দলটোৰ সৈতে উপাধ্যক্ষ আৰু স্কুল ব্যৱস্থাপনা সমিতিৰ সদস্য পি বি গুৰুং উপস্থিত আছিল।
নতুন দিল্লীৰ ৰাষ্ট্ৰীয় শিশু ভৱনত অনুষ্ঠিত এই প্ৰতিযোগিতাত মানৱ সম্পদ উন্নয়ন মন্ত্ৰনালয়ে জনোৱা অনুৰোধ মৰ্মে ছিকিম সৰ্ব শিক্ষা অভিযানৰ ৰাজ্যিক প্ৰকল্প সঞ্চালক ভীম থাটালো উপস্থিত আছিল।
মানৱ সম্পদ উন্নয়নৰ মুখ্য সচিৱ জি পি উপাধ্যায়ে অনুষ্ঠানৰ জৰিয়তে বিজয়ী সকলক শুভেচ্ছা জনোৱাৰ লগতে ভৱিষ্যতে নিজৰ নিজৰ কৰ্মক্ষেত্ৰত আগুৱায় যোৱাৰ বাবে আশীৰ্বাদ প্ৰদান কৰে।
চাদাম স্কুল পাইপ বেণ্ডটো যোৱাবছৰৰ মে মাহত গঠন কৰা হৈছিল আৰু অতি কম সময়ৰ ভিতৰতে সফলতাৰ শিখৰ চুবলৈ সক্ষম হৈছে।
উল্লেখযোগ্য যে অলপতে ছিকিমৰ ব্ৰেণ্ড এম্বেছেদৰ হিচাপে নিযুক্তি লাভ কৰা ভাৰতৰ সংগীতৰ যাদুকৰ এ আৰ ৰহমানৰ উপস্থিতিত ৰেড পাণ্ডা উইণ্টাৰ কাৰ্ণিভেলত এই বছৰৰে ৮ তাৰিখে চাদাম স্কুল পাইপ বেণ্ডটোৱে বেণ্ড পৰিৱেশন কৰিবলৈ সুযোগ লাভ কৰিছিল। স্কুল পাইপ বেণ্ডটোৰ প্ৰদৰ্শন উপভোগ কৰি ৰহমানে উজ্জ্বল ভৱিষৎ কামনা কৰাৰ লগতে পৰৱৰ্তী মিউজিক পৰিকল্পনাত সুযোগ দিয়াৰো কথা ঘোষণা কৰে।
