বোকাখাত শিলভেটা গাওঁৰ ৰাইজে কালি কৰায়ত্ব কৰি আৰক্ষীক গটাই দিয়া সন্দেহযুক্ত আনলা উগ্ৰপন্থী দুজনৰ পৰা বোকাখাত আৰক্ষীয়ে এটা ৭.৬৫ এম এম পিষ্টল আৰু তিনি জাঁই ৩০৩ ৰাইফলৰ সজীৱ গুলী উদ্ধাৰ কৰিছে ৷
কালি শিলভেটা গাওঁৰ ৰাইজৰ হাতত বেয়াকৈ প্ৰহৃত হৈ যোৰহাট চিকিৎসা মহাহিদ্যালয়ত চিকিৎসাধীন হৈ থকা ধৃত আনলা সদস্য দুজনে দিয়া স্বীকাৰোক্তিৰ আধাৰত অনন্ত তাঁতীৰ পৰা আৰক্ষীয়ে উক্ত পিষ্টল আৰু গুলী উদ্ধাৰ কৰে বুলি বোকাখাত মহকুমা আৰক্ষী বিষয়া বিতুল চেতিয়াই জানিবলৈ দিয়ে।
উল্লেখযোগ্য যে সন্দেহযুক্ত উগ্ৰপন্থী দুজনে দীৰ্ঘ দিন ধৰি বোকাখাতৰ শিলভেটা গাওঁলৈ আহি গাওঁবাসীক বন্দুক দেখুৱাই ভিত্তিগ্ৰস্ত কৰি আহিছিল আৰু গাওঁবাসীয়ে এই সম্পৰ্কত বোকাখাত আৰক্ষীক খবৰো দিছিল ৷ ৩ মে’ৰ নিশা পুনৰ তেওঁলোক গাওঁখনলৈ অহাৰ সময়ত গাওঁবাসীয়ে কৌশলেৰে কৰায়ত্ব কৰি উত্তম মাধ্যম দি বোকাখাত আৰক্ষীক চমজাই দিছিল ৷
ৰাইজৰ প্ৰহাৰত গুৰুত্বৰ ভাৱে আহত হোৱা উগ্ৰপন্থী দুজনক বোকাখাতত প্ৰাথমিক চিকিৎসা প্ৰদান কৰি বোকাখাত আৰক্ষীয়ে পিছত যোৰহাট চিকিৎসা মহাবিদ্যালয়লৈ প্ৰেৰণ কৰিছিল ৷ সম্প্ৰতি আৰক্ষীৰ জিম্মাতে চিকিৎসাধীন হৈ আছে সন্দেহযুক্ত আনলা সদস্য দুজন ৷
