অসমৰ শদিয়াৰ দাঁতিতে থকা অৰুণাচল প্ৰদেশৰ লোহিত জিলাৰ কিংবদন্তি তথা লোকাচাৰ জড়িত বিখ্যাত পৰশুৰামকুণ্ডত হাজাৰ হাজাৰ তীৰ্থযাত্ৰীয়ে ভিৰ কৰেহি মকৰ সংক্ৰান্তি উপলক্ষে। পৰম্পৰাগত লোকবিশ্বাসক সাৰোগত কৰি এই তীৰ্থযাত্ৰীসকলে ইয়াত থকা জলাশয়ত গা ধুই নিজকে তৃপ্ত কৰে।
উল্লেখযোগ্য যে তীৰ্থযাত্ৰীৰ সমাগমক লক্ষ্য কৰি মকৰ সংক্ৰান্তিৰ দিনটোক কেন্দ্ৰ কৰি ইয়াত মেলা আয়োজন কৰা হয়, যাক পৰশুৰাম কুণ্ড মেলা বুলি থলুৱাভাৱে কোৱা হয়।
লোহিত জিলাৰ ৱাক্ৰোৰ অতিৰিক্ত সহকাৰী আয়ুক্ত ডি ৰিবাই সংবাদ মাধ্যমৰ আগত কয় যে পৰশুৰাম কুণ্ড মেলা কোনো খেলিমেলি নোহোৱাকৈ অনুষ্ঠিত কৰা হয় আৰু চৰকাৰে তীৰ্থযাত্ৰীসকলৰ বাবে প্ৰায় সকলো ব্যৱস্থা কৰি দিছিল।
চৌব্বিচ ঘণ্টীয়া নিৰাপত্তা নিশ্চিত কৰাৰ বাবে আৰক্ষীক সহায় কৰিবলৈ চি আৰ পি এফ আৰু আই আৰ বি এনৰ জোৱান মোতায়েন কৰা হয়। আনহাতে ৱাক্ৰোৰ বিভিন্ন ঠাইৰ পৰা অহা স্বেচ্ছাসেৱীসকলেও ভিৰ পৰিচালনা কৰাত যথেষ্ট সহায় কৰে।
ডি ৰিবাই দিয়া তথ্য মতে এইবাৰ তীৰ্থযাত্ৰীৰ সংখ্যা বেছি দেখা গৈছে। ইয়াৰ কাৰণ হিচাপে ড০ ভূপেন হাজৰিকা সেঁতু দৰ্শন স্পৃহাকো তেওঁ আঙুলিয়ায়। অসমৰ পৰাও শ শ পৰ্য্যটক যোৱাৰ কথা তেওঁ জানিবলৈ দিয়ে।
আনহাতে লোহিত জিলাৰ উপায়ুক্তই মেলা উপলক্ষে মেলাস্থলীতে শিবিৰ পাতি লৈছিল। তেওঁ এই মেলা যাতে সফল তথা অপ্ৰীতিকৰ ঘটনাৰ পৰা মুক্ত হয় তাৰ বাবে তেওঁ সকলো ধৰণৰ চেষ্টা কৰা বুলি জানিবলৈ দিয়ে। তীৰ্থযাত্ৰীসকলক প্ৰয়োজনৰ সময়ত সেৱা আগ বঢ়াব পৰাকৈ সেনা, আই টি বি পি তথা অসামৰিক প্ৰশাসনৰ দ্বাৰা অস্থায়ী চিকিৎসা শিবিৰো স্থাপন কৰা হৈছিল।
