অসমৰ আদিম ভূমিপুত্ৰ, স্বাধীনচেতিয়া মটক জনগোষ্ঠী লোকসকলক স্বাধীনতাৰ ৭১ বছৰৰ অতিক্ৰম কৰাৰ পাছতো আজি পৰ্যন্ত চৰকাৰে কোনো ধৰণৰ গুৰুত্ব প্ৰদান নকৰিলে।
এক প্ৰেছ বিজ্ঞপ্তিৰ যোগেদি সদৌ অসম মটক সন্মিলনৰ সাধাৰণ সম্পাদক কাজল গোঁহাই আৰু সদৌ অসম মটক যুৱ ছাত্ৰ সন্মিলনৰ সভাপতি ডেভিদ চেতিয়াই এক যৌথ বিবৃতিত ক্ষোভ প্ৰকাশ কৰি কয় যে, ভাৰতৰ সংবিধানৰ নূন্যতম অধিকাৰ জনজাতিকৰণ বিষয়টোক লৈ চৰকাৰে ভেঙুচালি কৰি আহিছে।
জনগোষ্ঠীটোৰ ন্যায্য প্ৰাপ্য, অনুসূচিত কৰণৰ লগতে বিভিন্ন দাবীত অহা ১৪ মাৰ্চ, ২০১৮ তাৰিখে দিচপুৰ লাষ্টগেটত মটক জনগোষ্ঠীটোৰ পিতৃ সংগঠন সদৌ অসম মটক সন্মিলন, ভাতৃ সংগঠন সদৌ অসম মটক যুৱ ছাত্ৰ সন্মিলন আৰু সদৌ অসম মটক মহিলা পৰিষদৰ এক অৱস্থান ধৰ্মঘট প্ৰতিবাদী কাৰ্যসূচী আৰু ১৫ মাৰ্চ তাৰিখে অসম ৰাজ্যিক সংগ্ৰাহালয়ৰ কনকলাল বৰুৱা প্ৰেক্ষাগৃহত এখনি নাগৰিক সভা আহ্বান কৰিছে।
উক্ত সভাৰ বিষয়বস্তু মটক জনগোষ্ঠীৰ সাংবিধানিক সুৰক্ষা আৰু ভূমি অধিকাৰ শীৰ্ষক এখনি আলোচনা চক্ৰ আয়োজন কৰা হৈছে।
আলোচনা চক্ৰৰ সঞ্চালক, প্ৰাক্তন অধ্যাপক তৰুণ কুমাৰ গগৈ, নিৰ্দিষ্ট বক্তা বিশিষ্ট জনগোষ্ঠীয় লিখক ইন্দিবৰ দেউৰী, গুৱাহাটী উচ্চ ন্যায়ালয়ৰ অধিবক্তা শান্তনু বৰঠাকুৰ, বিশিষ্ট সাংবাদিক অজিত কুমাৰ ভূঞা আৰু কটন মহাবিদ্যালয়ৰ প্ৰাক্তন অধ্যক্ষ উদয়াদিত্য ভৰালী উপস্থিত থাকিব।
