ঝাৰখণ্ডৰ কংগ্ৰেছ বিধায়ক ভূষণ ব’ৰাৰ বিৰুদ্ধে উত্থাপন হৈছে এগৰাকী নাবালিকাক ধৰ্ষণ কৰাৰ গুৰুতৰ অভিযোগ। ছিমডেগাত থকা বিধায়কগৰাকীৰ বাসগৃহত কিশোৰীগৰাকীৰ ওপৰত যৌন নিৰ্যাতন চলোৱাৰ অভিযোগ উত্থাপন হৈছে। কেৱল সেয়াই নহয়, এই ঘটনা কাৰো আগত প্ৰকাশ কৰিলে প্ৰাণে মৰাৰ ভাবুকি দিয়াৰো অভিযোগ আনিছে কিশোৰীগৰাকীয়ে। ঘটনাক লৈ ইতিমধ্যে উত্তপ্ত হৈ পৰিছে ঝাৰখণ্ডৰ ৰাজনীতি। বিজেপিয়ে বিধায়কগৰাকীৰ বিৰুদ্ধে প্ৰতিবাদ সাব্যস্ত কৰিছে।
কিশোৰীগৰাকীৰ অভিযোগ অনুসৰি, বিধায়ক ভূষণ ব’ৰাৰ পত্নী আৰু তেওঁৰ ভগ্নীয়ে বিদ্যালয়ত নামভৰ্তি কৰাই দিয়াৰ প্ৰতিশ্ৰুতি দি তেওঁক বিধায়কগৰাকীৰ বাসগৃহলৈ লৈ গৈছিল। কিন্তু তাত উপস্থিত হোৱাৰ পাছত তেওঁক ঘৰুৱা সহায়িকাৰ কামত নিয়োগ কৰা হয় বুলি অভিযোগ উঠিছে। কিশোৰীগৰাকীৰ দাবী, যোৱা ৫ আগষ্টত বিধায়কগৰাকীয়ে তেওঁৰ ওপৰত ধৰ্ষণ চলাইছিল। ঘটনাৰ অভিযোগ লাভ কৰাৰ পাছতে কিশোৰীগৰাকীৰ স্বাস্থ্য পৰীক্ষা কৰোৱা হয়। ইতিমধ্যে বিধায়কগৰাকীৰ বিৰুদ্ধে পকছো আইনৰ অধীনত গোচৰ ৰুজু কৰা হৈছে।
জিলাখনৰ ডিএছপি নীৰজ কুমাৰে জনোৱা অনুসৰি, কিশোৰীগৰাকীয়ে বিধায়কগৰাকীৰ বিৰুদ্ধে ধৰ্ষণৰ অভিযোগ উত্থাপন কৰিছে। যোৱা ৫ আগষ্টত এই ঘটনা সংঘটিত হোৱা বুলি তেওঁ আৰক্ষীক জনাইছে। লগতে বিধায়কৰ পত্নী আৰু তেওঁৰ ভগ্নীয়ে কিশোৰীগৰাকীক বিধায়কৰ বাসগৃহলৈ লৈ যোৱাৰ কথাও অভিযোগত উল্লেখ কৰিছে। আৰক্ষীয়ে ইতিমধ্যে ঘটনাৰ তদন্ত আৰম্ভ কৰিছে।
ইফালে, এই ঘটনাক লৈ ৰাজ্যখনৰ ৰাজনৈতিক মহলতো তীব্ৰ প্ৰতিক্ৰিয়াৰ সৃষ্টি হৈছে। ঝাৰখণ্ডৰ মুক্তি মৰ্চা আৰু কংগ্ৰেছৰ মিত্ৰজোঁটৰ চৰকাৰক লক্ষ্য কৰি লৈছে বিজেপিয়ে। দলটোৰ অভিযোগ, আন ৰাজ্যত নাৰী অধিকাৰ আৰু সুৰক্ষাক লৈ সৰৱ হোৱা কংগ্ৰেছ আৰু ইয়াৰ সহযোগী দলসমূহে নিজৰ ৰাজ্যৰ এনে ঘটনাক লৈ নীৰৱতা অৱলম্বন কৰিছে। বিজেপিৰ মহিলা মৰ্চাৰ সভানেত্ৰী সীমা সিঙে কয় যে আদালতত বিধায়কগৰাকীৰ বিৰুদ্ধে অভিযোগ প্ৰমাণিত হ’লে তেওঁক ফাঁচিৰ শাস্তি বিহা উচিত।
আনহাতে, কিশোৰীগৰাকী নিজৰ ঘৰত কাম কৰিছিল বুলি স্বীকাৰ কৰিলেও ধৰ্ষণৰ অভিযোগ সম্পূৰ্ণৰূপে অস্বীকাৰ কৰিছে বিধায়ক ভূষণ ব’ৰাই। তেওঁৰ দাবী, এই অভিযোগৰ আঁৰত বিৰোধী দল আৰু কংগ্ৰেছৰ পৰা বহিষ্কৃত একাংশ নেতাৰ ষড়যন্ত্ৰ আছে। বিধায়কগৰাকীৰ ভাষ্য অনুসৰি, কিশোৰীগৰাকী জুলাই মাহতে তেওঁৰ বাসগৃহ এৰি গুচি গৈছিল। তাৰ প্ৰায় চাৰি মাহৰ পাছতহে এই অভিযোগ উত্থাপন কৰা হৈছে বুলি তেওঁ প্ৰশ্ন তুলিছে। কিশোৰীগৰাকীৰ সৈতে সঁচাকৈয়ে কোনো অন্যায় সংঘটিত হোৱা হ’লে তেওঁ আগতেই পৰিয়ালৰ লোকক জনাব পাৰিলেহেঁতেন বুলিও মন্তব্য কৰে বিধায়কগৰাকীয়ে।
এতিয়া আৰক্ষীৰ তদন্তত প্ৰকৃত ঘটনা কি পোহৰলৈ আহে, সেয়াহে লক্ষণীয়। এগৰাকী নাবালিকাক বিদ্যালয়ত নামভৰ্তি কৰোৱাৰ প্ৰতিশ্ৰুতি দি বিধায়কৰ বাসগৃহলৈ নিয়াৰ অভিযোগৰ আঁৰত কাৰ ভূমিকা আছিল? অভিযোগৰ সত্যতা তদন্তত প্ৰমাণিত হ’লে দোষীৰ বিৰুদ্ধে কি ব্যৱস্থা গ্ৰহণ কৰা হ’ব? এই প্ৰশ্নই এতিয়া জোকাৰিছে ঝাৰখণ্ডৰ ৰাজনীতি।
