মণিপুৰ আৰক্ষী তথা ২৬ নং অসম ৰাইফলচে যুটীয়া অভিযান চলাই তিনিজন অপহৰণকাৰী আটক কৰে। ২৮ ডিচেম্বৰত এজন ট্ৰাক চালকৰ অপহৰণৰ সৈতে জড়িত ধৃত অপহৰণকাৰী কেইজন এটা অল্প খ্যাত উগ্ৰপন্থী গোটৰ সদস্য বুলি জানিব পৰা গৈছে। নিৰ্দিষ্ট সূত্ৰৰ ভিত্তিত যুটীয়া অভিযান চলাই আটক কৰিবলৈ সক্ষম হোৱা উগ্ৰপন্থী কেইজনক মুইৰেইৰ ৰিডেনচন মুইভা ওৰফে ব্ৰুচলী(২১), থামনাপকপিৰ মৈৰাংথেম বুংগচা ওৰফে ইশ্বৰজিত মেইটি (৩০) আৰু চুৰাচানদপুৰৰ লামগ’উলুন মিচাও ওৰফে পাউলিন’ বুলি চিনাক্ত কৰা হৈছে। আৰক্ষীয়ে জানিবলৈ দিয়া অনুসৰি ধৃত উগ্ৰপন্থী তিনিজনৰ দুজনক লামলাই মায়াই লেইকাৰ পৰা আটক কৰাৰ পৰিৱৰ্তে আনজন সদস্যক মন্ত্ৰীপুখুৰীৰ পৰা আটক কৰা হয়। সুৰক্ষা বাহিনীৰ এক সূত্ৰৰ পৰা জানিব পৰা মতে উগ্ৰপন্থীকেইজন ইউনাইটেড নাগা পিপ’ল কাউন্সিল/চিং টাম লিবাৰেচন আৰ্মি (UNPC/CTLA)ৰ সদস্য। তেওঁলোকৰ পৰা এটা ৯ এম এম পিষ্টল, ৫ জাঁই সক্ৰিয় গুলী, তিনিটা ম’বাইল ফোন আৰু এখন হ’ণ্ডা দিঅ’ স্কুটাৰ(এম এন -০১৫ ই/০২১৩) জব্দ কৰা হয়। পূব ইম্ফল জিলাৰ আৰক্ষী সূত্ৰই জনোৱা অনুসৰি পৰৱৰ্তী আইনী ব্যৱস্থা লোৱাৰ উদ্দেশ্যে তিনিওজনকে ৩০ ডিচেম্বৰত লামাই আৰক্ষী চকীলৈ প্ৰেৰণ কৰা হয়। আনহাতে উক্ত উগ্ৰপন্থী কেইজনৰ লগতে আৰক্ষী-সেনাৰ যুটীয়া দলটোৱে আদাখ’ মাও নামৰ ট্ৰাক চালকজনকো উদ্ধাৰ কৰিবলৈ সক্ষম হয়।
