মণিপুৰৰ থাদৌ জনগোষ্ঠীয়ে শস্যৰ গজালি মেলা আৰু শস্যৰ প্ৰচুৰ উৎপাদনৰ লগত সংগতি ৰাখি উদযাপন কৰা ‘হুন’ উৎসৱ কালি ৰাজ্যখনৰ কাংপকপি জিলাৰ কেইথেলমেনবি মিলিটেৰি কলনিত উদযাপন কৰা হয়। কৃষি ভিত্তিক এই উৎসৱটোত শস্যৰ প্ৰাচুৰ্য্যময় উৎপাদনৰ বাবে ধন্যবাদ জ্ঞাপনৰ কাৰ্য্যসূচী লোৱা হয়।
অনুষ্ঠানটোৰ মূল কাৰ্য্যসূচীত ৰাজ্যখনৰ ৰাজ্যপাল ড০ নাজমা হেপটুল্লাৰ লগতে কৃষি মন্ত্ৰী ভি হংখলিয়ান আৰু সমাজ কল্যাণ মন্ত্ৰী নেমচা কিপগেন মুখ্য অতিথি হিচাপে উপস্থিত আছিল।
উপস্থিতসকলৰ আগত ভাষণ দি ৰাজ্যপাল হেপটুল্লাই কয় থাদৌ জনজাতিটোৰ থাদৌ উৎসৱটোৱে ৰাজ্যখনৰ ভাতৃত্ববোধ অধিক মজবুত কৰিব বুলি তেওঁ আশা ৰাখিছে। লগতে তেওঁ এই উৎসৱটোক আনন্দ আৰু মংগলময়তাৰ উৎসৱ বুলি কয়। তেওঁ কয়, হুন উৎসৱ বসন্তৰ সময়ত উদযাপিত হয় আৰু এই উৎসৱটোৱে আমাক কেৱল আনন্দই নিদিয়ে, লগতে অতীতলৈ ঘূৰি চোৱা আৰু ভৱিষ্যতৰ বাবে পৰিকল্পনা কৰাৰো সুযোগ দিয়ে।
এই উৎসৱটোক তেওঁ থাদৌ জনগোষ্ঠীৰ লোকসকলৰ জীৱন যাপনৰ প্ৰতীক আৰু ই সদায় তেওঁলোকৰ সংস্কৃতিৰ অবিচ্ছেদ্য অংগ হৈ থাকিব। আনহাতে ৰাজ্যপাল হেপতুল্লাই কয় যে ৰাজ্যখনৰ এটা বৃহৎ সম্প্ৰদায় হিচাপে ৰাজ্যখনৰ ঐক্যত তেওঁলোকৰ বৃহৎ বৰঙনি আছে। ১৯১৭-১৯ত হোৱা এংলো-কুকি যুদ্ধই তেওঁলোকৰ সাহস আৰু স্বাধীনতা প্ৰিয় মনটোৰ প্ৰমাণ দিয়ে। তেওঁ জনসাধাৰণক বিভাজনমূলক শক্তিৰ পৰা নিজকে সুৰক্ষিত কৰি ৰাখিবলৈ আহ্বান জনায়। তেওঁ কয় যে থাদৌসকলৰ হুন উৎসৱে কেৱল থাদৌসকলৰ সগোত্ৰীয় জনগোষ্ঠীবোৰৰ সামগ্ৰিক পৰিচয়ক দাঙি ধৰা নাই, লগতে শান্তি, প্ৰেম, বন্ধুত্ব আৰু সাম্প্ৰদায়িক সম্প্ৰীতি বঢ়াত সহায় কৰিব। তেওঁ সকলো ধৰণৰ মতভেদ আলাপ-আলোচনাৰ মাজেৰে সমাধান কৰা উচিত বুলিও মত দিয়ে। বন্ধ-অৱৰোধে দুখীয়া শ্ৰেণীটোৰহে ক্ষতি কৰে বুলিও কয়।
আনহাতে কৃষি মন্ত্ৰী হংখালিয়ানে কয় যে তেওঁলোকৰ উপৰিপুৰুষসকলে এই উৎসৱটোক গুটি সিঁচাৰ উৎসৱ হিচাপে পালন কৰিছিল। সমাজ কল্যাণ মন্ত্ৰী নেমচা কিপজেনেও এই উৎসৱটোৱে সকলোকে একেলগ হোৱাৰ বাবে এখন মঞ্চ দিছে। উপৰিপুৰুষ সকলে তেওঁলোকলৈ এই উৎসৱক উত্তৰাধিকাৰ এৰি গৈছে বুলি তেওঁ কয়। উৎসৱৰ কাৰ্য্যসূচীটোত ভালে সংখ্যক লোকৰ লগতে বহুকেইজন সমাজকৰ্মীও উপস্থিত আছিল।
