মনিপুৰৰ কাকচ্চিং চহৰৰ হিংসাত্মক ঘটনাৰ পিছত কালি ৭ঃ৩০ বজাৰপৰা সান্ধ্য আইন জাৰি কৰাৰ ফলত অঞ্চলটোৰ স্বাভাৱিক জীৱন যাত্ৰা ব্যাহত হৈছে।
সংবাদমাধ্যমৰ প্ৰতিবেদন অনুসৰি কাকচ্চিঙৰ জিলা উপায়ুক্তই ১৪৪ (২) ধাৰাৰ অধীনত পৰৱৰ্তী নিৰ্দেশ নিদিয়ালৈকে এই সান্ধ্য আইন জাৰি কৰিছে।
উল্লেখযোগ্য যে দ্ৰুতবেগী এখন মাৰুতি গাড়ীয়ে স্কুটাৰ থেলি আহি থকা দুজন লোকক খুন্দিয়াই নিহত কৰাৰ পিছত কালিৰ হিংসাত্মক ঘটনা সংঘটিত হৈছিল। অৱশ্যে গাড়ীখনত থকা লোক জন/সকল নিৰাপদে ঘটনাস্থলীৰপৰা আঁতৰি যাবলৈ সক্ষম হয়।
ঘটনাটোৰ খবৰ বনজুইৰ দৰে বিয়পি পৰাৰ পিছতে স্থানীয় লোকসকলে মৃত্যুৰ বাবে জগৰীয়া লোক জন/সকলক গ্ৰেপ্তাৰ কৰাৰ দাবীত আৰক্ষী থানা ঘেৰাও কৰে।
পৰিস্থিতি উত্তেজনাপূৰ্ণ আৰু প্ৰতিবাদী আৰু আৰক্ষীৰ মাজত হিংসাত্মক সংঘৰ্ষৰ সূচনা হোৱাৰ লগে লগে প্ৰশাসনে অঞ্চলটোত সান্ধ্য আইন জাৰি কৰে। হিংসাৰ সৈতে জড়িত থকাৰ অভিযোগত আৰক্ষীয়ে কিছুসংখ্যক প্ৰতিবাদকাৰীকো গ্ৰেপ্তাৰ কৰে।
কাকচ্চিং জিলাৰ উপায়ুক্ত এন তেলিয়েনে জাৰি কৰা এক বিবৃতি অনুসৰি, ‘কিছুমান ব্যক্তিয়ে তেওঁলোকৰ উদ্দেশ্য পূৰণ কৰাৰ বাবে বেআইনী কাৰ্য্যকলাপ চলাই থকাৰ ফলত কাকচ্চিং চহৰৰ পৰিস্থিতি অশান্ত হৈ থকা বুলি আৰক্ষীৰপৰা এটা প্ৰতিবেদন পোৱা হৈছে। এনে অশান্ত পৰিস্থিতিয়ে শান্তি ভংগ কৰিব আৰু ৰাজহুৱা শান্তিৰ প্ৰতি ভাবুকি আনিব আৰু ফলত মানুহৰ জীৱন আৰু সম্পত্তি বিপদাপন্ন হ’ব।’
খবৰ অনুসৰি সমগ্ৰ কাকচ্চিং জিলাতে নিৰাপত্তা ব্যৱস্থা বঢ়াই তোলা হৈছে।
