দেশৰ প্ৰথমটো নদী দ্বীপ জিলা মাজুলীৰ সৈতে বহিঃসংযোগী যাতায়াতী ব্যৱস্থাক উন্নীত কৰিব পৰাকৈ অহা আগষ্ট মাহৰ পৰা নিমাতী-কমলাবাৰী পাৰঘাটৰ মাজত ব্ৰহ্মপুত্ৰৰ বুকুয়েদি আৰম্ভ হ’ব অত্যাধুনিক ৰ’-ৰ’ ফেৰী সেৱা।
ভাৰতীয় আভ্যন্তৰীণ জলপথ প্ৰাধিকৰণে আগষ্টৰ শেষ ভাগত এই জলপথটোত নিয়মীয়া সেৱা আৰম্ভ কৰিব পৰাকৈ এখন অত্যাধুনিক ৰ’-ৰ’ জাহাজ ৰাজ্যৰ অভ্যন্তৰীণ জলপৰিবহণ বিভাগক অৰ্পণ কৰিব। মাজুলীত আজি এই কথা ঘোষণা কৰে অভ্যন্তৰীণ জলপৰিবহন বিভাগ(আই ডব্লিউ টি)ৰ সঞ্চালক ভাৰতভূষন দেৱ চৌধুৰীয়ে।
নিমাতি আৰু কমলাবাৰী পাৰঘাটৰ মাজত আই ডব্লিউ টি বিভাগৰ ফেৰী সেৱাৰ মান উন্নীত কৰা সন্দৰ্ভত মাজুলী জিলা প্ৰশাসনৰ সহযোগত বিভাগটোৱে কমলাবাৰী মিলন সংঘত আয়োজন কৰা এখন আলোচনা চক্ৰত এই কথা ঘোষণা কৰে । লগতে উল্লেখ কৰে যে মুখ্য মন্ত্ৰী সৰ্বানন্দ সোণোৱালৰ বিশেষ উদ্যোগত ভাৰতীয় অভ্যন্তৰীণ জলপথ প্ৰাধিকৰণে মাজুলীৰ বাবে এই ৰ’-ৰ’ জাহাজখন আগবঢ়াবলৈ সিদ্ধান্ত লয়।
প্ৰাধিকৰণে আই ডব্লিউ টি বিভাগক শেহতীয়াকৈ অৱগত কৰা মতে একেলগে ৮-১০ খন মালবাহী ট্ৰাকৰ লগতে ২০০-৩০০ যাত্ৰী পৰিবহণৰ সামৰ্থ থকা ৰ’-ৰ’ জাহাজখন আগষ্টৰ শেষৰফালে মাজুলী পাবহি।
ইফালে মুখ্য মন্ত্ৰীৰ নিৰ্দেশত বিভাগটোৱে নিমাতী-কমলাবাৰী আৰু নিমাতী-অফলামুখ পাৰঘাটৰ মাজত ফেৰী সেৱা উন্নত কৰিবলৈ বিশেষ ব্যৱস্থা গ্ৰহণ কৰিছে। সঞ্চালক দেৱচৌধুৰীয়ে আলোচনা চক্ৰত ঘোষণা কৰা অনুসৰি অহা জুনত নিমাতী-কমলাবাৰীৰ মাজত নিয়মীয়া ফেৰী সেৱা আগবঢ়াব পৰাকৈ ২৮ মিটাৰ দৈৰ্ঘ্যৰ দুখনকৈ ষ্ট্ৰীলৰ মাৰ নাও মাজুলী পাবহি।
ইয়াৰ প্ৰতিখন মাৰনাৱতে ৮-১০ খন গাড়ী আৰু ১৫০ জনকৈ যাত্ৰী পাৰাপাৰ কৰিব পাৰিব। একেদৰে আগষ্টত আন এখন ৩০ মিটাৰ দৈৰ্ঘ্যৰ যাত্ৰীবাহী নাও, জুলাইত ২৫ মিটাৰ দৈৰ্ঘ্যৰ নতুন কাঠৰ নাও আৰু ২৫ মিটাৰ দৈৰ্ঘ্যৰ নতুন কাঠৰ নাও মাজুলী আৰু যোৰহাট সংযোগী জলপথত চলাচলৰ বাবে বিভাগটোৱে আনিব বুলি তেওঁ সদৰী কৰে।
ইফালে মাজুলীৰ পৰা অভ্যন্তৰীণ জলপৰিবহণ ব্যৱস্থাক অধিক ফলপ্ৰসুভাবে পৰিচালনা কৰিব পৰাকৈ এমাহৰ ভিতৰত বৰ্তমান ডিব্ৰুগড়ত থকা আই ডব্লিউ টিৰ মাণ্ডলিক কাৰ্যবাহী অভিযন্তাৰ কাৰ্যালয়টো মাজুলীলৈ স্থানান্তৰিত কৰিব বুলি সঞ্চালকজনে ঘোষণা কৰে ।
আলোচনা চক্ৰত আছু, যুৱ ছাত্ৰ পৰিষদ, বিজেপি, অগপ, জ্যেষ্ঠ নাগৰিক সন্থা, জিলা সাংবাদিক সন্থা, মহিলা সমিতিকে ধৰি বহু কেইটা দল-সংগঠনৰ প্ৰতিনিধি, বিশিষ্ট নাগৰিক তথা বহুসংখ্যক লোকে অংশগ্ৰহণ কৰি এই ফেৰী সেৱা উন্নতকৰণৰ বিষয়ত পৰামৰ্শ আগবঢ়ায়।
