মাজুলী জিলাৰ উজনি মাজুলীত বুধবাৰৰ নিশা সংঘটিত খাদ্য-বিষক্ৰিয়া ঘটনাৰ পাছত গড়মূৰ অসামৰিক চিকিৎসালয়ত কালি ভৰ্তি কৰোৱা আক্ৰান্তসকলৰ মাজৰে ৫০গৰাকীক আজি বিয়লি পৰ্যন্ত চিকিৎসালয়ৰ ঘৰলৈ যাবলৈ অনুমতি দিছে চিকিৎসকে।
আক্ৰান্তসকলৰ ভিতৰৰে আন ১১ গৰাকী এতিয়াও গড়মূৰ অসামৰিক চিকিৎসালয়ত চিকিৎসাধীন হৈ থকাৰ উপৰি আন এগৰাকী নাবালিকা যোৰহাট চিকিৎসা মহাবিদ্যালয় হস্পিতালত ভৰ্তি হৈ আছে। শুক্ৰবাৰে সন্ধিয়া ৬ বজাত মাজুলী জিলা স্বাস্থ্য বিভাগৰ তত্বাৱধায়ক ডাঃ শশীধৰ ফুকনে জানিবলৈ দিয়া মতে দুয়োখন চিকিৎসালয়ত চিকিৎসাধীন আটাইকেইগৰাকীয়েই বৰ্তমান সম্পূৰ্ণ বিপদমুক্ত হোৱাৰ লগতে তেওঁলোকৰ স্বাস্থ্যৰ দ্ৰুত উন্নতি ঘটিছে। উল্লেখ্য যে পৰহি নিশা লুইতপৰীয়া গাঁও পঞ্চায়তৰ অন্তৰ্গত মোৱামাৰী গাঁৱত প্ৰশান্ত পেগু নামৰ লোকএজনৰ ঘৰত আয়োজিত জন্মদিনৰ অনুষ্ঠানত প্ৰসাদত দিয়া বুটমাহ খাই এই খাদ্য-বিষক্ৰিয়াত আক্ৰান্ত হয় গাঁওখনৰ বহকেইগৰাকী শিশু, মহিলাসহ ভালেসংখ্যক লোক। কালি দুপৰীয়াৰে পৰা নিশা পৰ্যন্ত বিষাক্ৰান্তসকলক প্ৰথমে নিকটৱৰ্তী ৰতনপুৰ মিৰি প্ৰাথমিক স্বাস্থ্য কেন্দ্ৰলৈ পৰিয়ালৰ লোকে নিয়াৰ পাছত তেওঁলোকৰ মাজৰে ৬২গৰাকীক কালি আবেলিৰ পৰা নিশাৰ ভিতৰত জিলাসদৰৰ গড়মূৰ অসামৰিক চিকিৎসালয়লৈ স্থানান্তৰ কৰোৱা হয়। ডাঃ ফুকনে প্ৰকাশ কৰা তথ্যমতে চিকিৎসালয়ত ভৰ্তি কৰোৱা মুঠ ৬২ গৰাকী আক্ৰান্ত লোকৰ মাজৰে ৫০ গৰাকীয়ে সম্পূৰ্ণ সুস্থ হৈ আজি বিয়লিৰ ভিতৰত নিজ নিজ ঘৰলৈ উভটি গৈছে। এতিয়াও অসামৰিক চিকিৎসালয়খনত চিকিৎসাধীন হৈ আছে এটি শিশু আৰু এগৰাকী গৰ্ভৱতীমহিলাসহ আন ১১ গৰাকী আক্ৰান্ত লোক। তেওঁলোক আটায়েই সম্প্ৰতি সম্পূৰ্ণ বিপদমুক্ত আৰু সুস্থিৰ অৱস্থাতে থকা বুলি নিশ্চিত কৰি চিকিৎসালয়খনৰ অধীক্ষক ডাঃ মাণিক মিলিয়ে জনোৱা মতে আজি নিশাটো চিকিৎসকৰ নিৰীক্ষণত ৰাখি কাইলৈ আগবেলাৰ ভিতৰতে তেওঁলোককো ঘৰলৈ যাবলৈ দিব পৰা হ’ব। আনহাতে যোৱা নিশা ১০.৩০ বজাত জিলা প্ৰশাসনৰ সহায়ত যোৰহাট চিকিৎসা মহাবিদ্যালয়লৈ উন্নত চিকিৎসাৰ বাবে জৰুৰীভাৱে যোৰহাট চিকিৎসা মহাবিদ্যালয় হস্পিতাললৈ মাইনা বৰুৱা নামৰ এগৰাকী ৬বছৰীয়া শিশুক প্ৰেৰণ কৰে গড়মূৰ অসামৰিক চিকিৎসালয় কৰ্তৃপক্ষই। খাদ্য-বিষক্ৰিয়াত আক্ৰান্ত এই শিশুটিক উন্নত চিকিৎসাৰ প্ৰয়োজন হোৱাৰ বিষয়ে অৱগত হৈ মাজুলীৰ উপায়ুক্ত দেৱপ্ৰসাদ মিশ্ৰই অতিৰিক্ত উপায়ুক্ত চিন্ময় নাথ আৰু সহকাৰী আয়ুক্ত অচ্যুৎ বৰুৱাক লৈ যোৱা নিশা ১০.২০ বজাত জৰুৰীভাৱে গড়মূৰ অসামৰিক চিকিৎসালয়লৈ গৈ জিলা স্বাস্থ্য বিভাগৰ তত্বাৱধায়ক ডাঃ শশীধৰ ফুকন আৰু অসামৰিক চিকিৎসালয়ৰ অধীক্ষক ডাঃ মাণিক মিলিসহ চিকিৎসকলৰ সিদ্ধান্তৰ আধাৰত শিশুটিক নিশাই যোৰহাটলৈ প্ৰেৰণৰ তাৎক্ষণিক ব্যৱস্থা কৰায়। জিলা স্বাস্থ্য বিভাগৰ তত্বাধায়ক ডাঃ ফুকনে আজি যোৰহাটৰ পৰা নিশ্চিত কৰা মতে বৰ্তমান যোৰহাট চিকিৎসা মহাবিদ্যালয় হস্পিতালত চিকিৎসাধীন শিশুটিৰ অৱস্থা সম্পূৰ্ণ বিপদমুক্ত। ইফালে, মাজুলীৰ উপায়ুক্ত মিশ্ৰই আজি আগবেলা পুণৰ গড়মূৰ অসামৰিক চিকিৎসালয়লৈ গৈ মোৱামাৰী গাঁৱৰ খাদ্য-বিষক্ৰিয়াত আক্ৰান্ত হৈ চিকিৎসাধীন লোকসকলৰ স্বাস্থ্যৰ বুজ লয়।
ইফালে মোৱামাৰী গাঁৱৰ খাদ্য-বিষক্ৰিয়া ঘটনা সন্দৰ্ভত নয়াবজাৰ আৰক্ষী চকীত ইতিমধ্যে এটা গোচৰ ৰুজু কৰি আৰক্ষীয়ে জন্মদিনৰ প্ৰসাদত ব্যৱহৃত বুটমাহৰ নমুনা সংগ্ৰহ কৰিছে। আনহাতে, এই খাদ্য-বিষক্ৰিয়া সন্দৰ্ভত তদন্তত সহায়ৰ বাবে এগৰাকী জ্যেষ্ঠ খাদ্য সুৰক্ষা বিষয়ায়ো আজি পুৱাৰ ভাগতে মাজুলীত উপস্থিত হৈ প্ৰসাদত ব্যৱহাৰ কৰা বুটমাহৰ নমুনা পৰীক্ষা কৰে।
