কংগ্ৰেছ তথা বিৰোধী শিবিৰৰ পিছত এইবাৰ জাতি লোকপিয়লৰ সপক্ষে মত দিছে স্বয়ং আৰ এছ এছ-এ। ৰাষ্ট্ৰীয় স্বয়ংসেৱক সংঘই পূৰ্বৰ স্থিতিৰ পৰা পিছুৱাই গৈ দাবী কৰে যে, “মানুহৰ বিকাশৰ বাবে জাতিগত লোকপিয়ল প্ৰয়োজনীয়। কিন্তু ইয়াক ভোটৰ ৰাজনীতিৰ বাবে ব্যৱহাৰ কৰা উচিত নহয়।” সংঘৰ এই বক্তব্যই স্বাভাৱিকতে কেন্দ্ৰত মোডী চৰকাৰৰ হেঁচা বৃদ্ধি কৰিছে।
কেৰালাৰ পালাক্কাৰেত সংঘৰ ৩ দিনীয়া সন্মিলনত অংশ লয় সংঘৰ মুখপাত্ৰ সুনীল আম্বেকাৰে। তাত ভাষণ দি তেওঁ কয়, ‘পিয়ল অতি স্পৰ্শকাতৰ বিষয়। তথ্যৰ উদ্দেশ্যে চৰকাৰে লোকপিয়ল কৰিব লাগে। কিন্তু জাতিগত প্ৰতিক্ৰিয়া আমাৰ সমাজত এক স্পৰ্শকাতৰ বিষয়। ৰাষ্ট্ৰীয় সংহতিৰ ক্ষেত্ৰত এইটো এটা গুৰুত্বপূৰ্ণ প্ৰশ্ন।’
তেওঁ লগতে কয় যে, “সেয়েহে এই কাম কোনো ধৰণে ৰাজনৈতিক স্বাৰ্থৰ বাবে কৰা উচিত নহয়। জাতি জনগণনা কেৱল মানৱ বিকাশৰ স্বাৰ্থতহে প্ৰয়োজনীয়।”
অৱশ্যে জাতি লোকপিয়লত সংঘই ৰাজনীতিৰ পৰা আঁতৰি থাকিবলৈ বাৰ্তা দিলে যদিও ৰাজনীতিৰ ক্ষেত্ৰখনত এই বিষয়ত মোডী চৰকাৰ বিপাঙত পৰিছে।
দীৰ্ঘদিন ধৰি জাতি লোকপিয়লৰ দাবী জনাই আহিছে বিৰোধী শিবিৰে। লোকসভাত বিৰোধী দলৰ নেতা ৰাহুল গান্ধীয়ে এই দাবীৰে কেন্দ্ৰৰ ওপৰত ধাৰাবাহিকভাৱে হেঁচা বৃদ্ধি কৰি আছে।
কেৱল সেয়াই নহয়, অংশীদাৰ দলসমূহেও এন ডি এ চৰকাৰৰ ওপৰত ধাৰাবাহিকভাৱে হেঁচা দি আহিছে। শেহতীয়াকৈ এলজেপিৰ আন এজন সদস্য তথা কেন্দ্ৰীয় মন্ত্ৰী চিৰাগ পাছৱানেও ৰাজহুৱাভাৱে জাতি গণনাৰ দাবী উত্থাপন কৰিছে।
তেওঁ কয়, ‘জাতি লোকপিয়ল সমাজৰ প্ৰান্তীয় লোকসকলক মূলসুঁতিলৈ অনাৰ অন্যতম উপায়। মোৰ দল সদায় এই দাবীৰ পক্ষত আছিল আৰু থাকিব।
