আজি কিছু দিন ধৰি ৰাজ্যৰ বিভিন্ন ঠাইত ৰে’লৰ খুন্দাত বহু লোকৰ মৃত্যু হৈ থকা অৱস্থাতে বুধবাৰে পুনৰ মৰানত এগৰাকী মহিলাৰ মৃতদেহ ৰে’লৱে লাইনত উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।
প্ৰাপ্ত তথ্য মতে বুধবাৰে মৰাণৰ ৰে’লৱে লাইনত এগৰাকী মহিলাৰ মৃতদেহ উদ্ধাৰ কৰা হয়। বুধবাৰে পুৱা দ্ৰুত বেগী ৰে’লৰ খুন্দাত মহিলা গৰাকীৰ মৃত্যু হোৱা বুলি স্থানীয় ৰাইজে সন্দেহ প্ৰকাশ কৰিছে।
মৃত মহিলা গৰাকীক মৰাণৰ তিলৈবাৰী গাঁৱৰ নিৱাসী নাইকল গগৈৰ পত্নী মিতালি গগৈ বুলি আৰক্ষীয়ে চিনাক্তকৰণ কৰিছে।
উল্লেখযোগ্য যে ৰাজ্যখনৰ বিভিন্ন ঠাইত ৰে’লৱে লাইনত প্ৰায়ে দুৰ্ঘটনা সংঘটিত হৈ আহিছে যদিও বিভাগীয় কৰ্তৃপক্ষই এই ক্ষেত্ৰত বৰ্তমানলৈকে কোনো ধৰণৰ পদক্ষেপ গ্ৰহণ কৰা নাই। যাৰ ফলত মৰাণৰ ৰাইজে এই দুৰ্ঘটনা প্ৰতিৰোধৰ বাবে বিভাগীয় কৰ্তৃপক্ষক বিহিত ব্যৱস্থা গ্ৰহণৰ বাবে আহ্বান জনাইছে।
