যাদবপুৰ বিশ্ববিদ্যালয়ত বুধবাৰৰ নিশাৰ পৰা বৃহস্পতিবাৰলৈ চলা ছাত্ৰ সংঘৰ্ষই নতুন বিতৰ্কৰ সৃষ্টি কৰিছে। সংঘৰ্ষৰ মাজতে বিশ্ববিদ্যালয়ৰ ৪ নম্বৰ গেটত থকা ঐতিহাসিক প্ৰতীকটো ভাঙি পেলোৱাৰ অভিযোগ উত্থাপন হৈছে। প্ৰতীকটো বিখ্যাত শিল্পী নন্দলাল বসুৰ নিৰ্দেশনাত নিৰ্মিত বিশ্ববিদ্যালয়ৰ ঐতিহ্যবাহী এমব্লেমৰ অংশ।
খবৰ অনুসৰি, বিশ্ববিদ্যালয়ত বাওঁপন্থী ছাত্ৰ সংগঠন আৰু অখিল ভাৰতীয় বিদ্যাৰ্থী পৰিষদ (ABVP)-ৰ সমৰ্থকৰ মাজত সংঘাতৰ সূত্ৰপাত হয়। এখন বৈঠকক কেন্দ্ৰ কৰি আৰম্ভ হোৱা উত্তেজনা ক্ৰমাৎ সংঘৰ্ষলৈ ৰূপান্তৰিত হয়। দুয়ো পক্ষৰ মাজত শ্লোগান, ধ্বজ জ্বলাই দিয়া আৰু মাৰপিটৰ ঘটনাও সংঘটিত হয় বুলি আৰক্ষী সূত্ৰৰ উদ্ধৃতিৰে প্ৰকাশ পাইছে। সংঘৰ্ষত কেইবাজনো লোক আহত হৈছে।
এই ঘটনাৰ মাজতেই বিশ্ববিদ্যালয়ৰ মুখ্য গেটত থকা নন্দলাল বসুৰ শিল্পকৰ্মৰ আধাৰত নিৰ্মিত এমব্লেমটো টানি নমাই ক্ষতিগ্ৰস্ত কৰাৰ অভিযোগ উঠিছে। যাদবপুৰ বিশ্ববিদ্যালয়ৰ নিজা বাৰ্ষিক প্ৰতিবেদনতো স্পষ্টকৈ উল্লেখ আছে যে বিশ্ববিদ্যালয়ৰ ছীল আৰু এমব্লেমৰ নক্সা নন্দলাল বসুৰ নিৰ্দেশনাত নিৰ্মাণ কৰা হৈছিল।
এই প্ৰতীকটো কেৱল এটা বিশ্ববিদ্যালয়ৰ ল’গ’ নহয়। তিনিটা শিখাৰে জ্বলি থকা প্ৰদীপে জ্ঞানৰ পোহৰ প্ৰতিনিধিত্ব কৰে। বিশ্ববিদ্যালয়ৰ ব্যাখ্যা অনুসৰি, তিনিটা শিখাই ক্ৰমে বৌদ্ধিক প্ৰশিক্ষণ, অনুভূতি আৰু কল্পনাৰ সমন্বয় তথা আধ্যাত্মিক বিকাশৰ প্ৰতীক বহন কৰে। পদুমৰ পাহিবোৰে দৰ্শন, চাৰুকলা আৰু সংস্কৃতিক প্ৰতিনিধিত্ব কৰে।
সেয়ে নন্দলাল বসুৰ এই সৃষ্টি মাটিত লুটিয়াই পৰাৰ দৃশ্যই কেৱল এটা সম্পত্তি ভাঙি পেলোৱাৰ ঘটনাকেই প্ৰতিনিধিত্ব নকৰে—ই যাদবপুৰৰ শৈক্ষিক আৰু সাংস্কৃতিক পৰম্পৰাক লৈও গভীৰ প্ৰশ্ন উত্থাপন কৰিছে।
যি প্ৰতীকত জ্ঞান, বুদ্ধি, কল্পনা আৰু আধ্যাত্মিক বিকাশৰ পোহৰৰ কথা কোৱা হৈছে, সেই প্ৰতীকেই যদি ছাত্ৰ ৰাজনীতিৰ সংঘৰ্ষত পদদলিত হয়, তেন্তে প্ৰশ্ন উঠিবই—তিনিটা শিখা কেৱল ভাঙি পৰিল নে যাদবপুৰৰ সেই পুৰণি স্পৰ্ধা, যুক্তি আৰু মুক্ত চিন্তাৰ প্ৰতীকী পোহৰতো আঘাত পৰিল?
আৰক্ষীৰ মতে, সংঘৰ্ষৰ ঘটনাত এই পৰ্যন্ত কোনো লোকক গ্ৰেপ্তাৰ কৰা হোৱা নাই বুলি প্ৰকাশ পাইছে। ঘটনাটোক লৈ বিশ্ববিদ্যালয় চৌহদত উত্তেজনা অব্যাহত আছে।
