ৰাজ্যখনত বন্যপ্ৰাণী আৰু মানুহৰ সংঘাতৰ স্বৰূপ উদঙাই এইবাৰ যোৰহাটত সংঘটিত হ’ল বাঘ হত্যাৰ আন এক ঘটনা। জীৱশ্ৰেষ্ঠৰ হিংসাৰ বলি হৈ কৰুণ মৃত্যুক সাৱটি ল’বলগীয়া হ’ল এটি নাহৰফুটুকীয়ে।
যোৰহাটত গঞাই বাঘটোক হত্যা কৰাৰ সময়ত নীৰৱ দৰ্শকৰ ৰূপত আছিল আৰক্ষী তথা বনকৰ্মী। বন বিভাগৰ লোকৰ সন্মুখতে স্থানীয় লোকে বাঘটোক কোবাই হানি-খুঁচি হত্যা কৰা ঘটনাই যোৰহাটত তীব্ৰ প্ৰতিক্ৰিয়াৰ সৃষ্টি কৰিছে।
যোৰহাট নগৰৰ পৰা প্ৰায় ১০ কিলোমিটাৰ নিলগৰ উজনি গায়ন গাঁৱত দেওবাৰে পুৱা ৯ মান বজাত এটা নাহৰফুটুকী বাঘ বনাঞ্চলৰ পৰা ওলাই আহি অঞ্চলটোত সন্ত্ৰাস সৃষ্টি কৰে।
বাঘটোৱে পানী আনিবলৈ যোৱা তথা খেতিপথাৰলৈ যোৱা লোকক আক্ৰমণ কৰে। এই ঘটনাৰ খবৰ পাই আৰক্ষী আৰু বন বিভাগৰ লোক ঘটনাস্থলীত উপস্থিত হয়।
আৰক্ষী আৰু বন বিভাগৰ লোকে বাঘটোক খেদি পঠাবলৈ চেষ্টা কৰে যদিও বাঘটোৱে তেওঁলোককো আক্ৰমণৰ লক্ষ্য কৰি লয়।
বাঘটোৰ আক্ৰমণত মোলান দত্ত আৰু তৰুণ গগৈ নামৰ আৰক্ষীৰ লোক দুজন গুৰুতৰভাৱে আঘাতপ্ৰাপ্ত হয়।
বাঘটোৰ আক্ৰমণত আৰক্ষীৰ লোক দুজনকে ধৰি মুঠ ১১ জন লোক আহত হয়।আঘাতপ্ৰাপ্তসকলক যোৰহাট চিকিৎসা মহাবিদ্যালয়ত ভৰ্তি কৰোৱা হয়।
ইয়াৰ পিছতে গাওঁবাসী উত্তেজিত হৈ পৰে আৰু তেওঁলোকে খেদি খেদি বাঘটোক হানি-খুঁচি হত্যা কৰে। বন বিভাগৰ লোকে পিছত মৃত বাঘটো উদ্ধাৰ কৰি লৈ আনে।
