জয়সাগৰস্থিত দাও ডিভিজনৰ সেনা আৰু আৰক্ষীৰ যুটীয়া অভিযানকাৰী এটা দলে সোমবাৰে আলফা (স্বা)ৰ এজন উগ্ৰপন্থী সদস্যক গ্ৰেপ্তাৰ কৰিবলৈ সক্ষম হয়। এটা গোপন সূত্ৰৰ পৰা পোৱা তথ্যৰ ভিত্তিতে অভিযানকাৰী দলটোৱে হালোৱাটিঙত এক অভিযান চলাই উগ্ৰপন্থীজনক গ্ৰেপ্তাৰ কৰে।
আটকাধীন সদস্যজনে উক্ত অঞ্চলত বিভিন্ন ধন দাবী, অস্ত্ৰ সৰবৰাহ আৰু নতুন সদস্য ভৰ্তীত নিয়োজিত হৈ থকা বুলি সেনাই খবৰ পোৱাত সদস্যজনক আটক কৰাৰ বাবে সেনাই দীৰ্ঘদিনৰে পৰা চেষ্টা অব্যাহত ৰাখিছিল।
সোমবাৰে উগ্ৰপন্থী সদস্যজন উক্ত অঞ্চলত বিচৰণ কৰি থকা বুলি সেনালৈ খবৰ অহাত জয়সাগৰ সেনা আৰু হালোৱাটিঙ আৰক্ষীয়ে অভিযান চলাই গ্ৰেপ্তাৰ কৰিবলৈ সক্ষম হয়।
আটকাধীন উগ্ৰপন্থী সদস্যজনৰ পৰা অভিযানকাৰী দলটোৱে এটা পিষ্টল, এটা সক্ৰিয় গুলীৰ ৰাউণ্ড, এটা মেগজিন আৰু ব্ৰাউন ছুগাৰৰ দুটা পেকেটৰ লগতে বিভিন্ন আপত্তিজনক সামগ্ৰী জব্দ কৰে।
ইফালে সদস্যজন শিৱসাগৰ জিলাৰ সুন্দৰপুৰ নিবাসী প্ৰয়াত বুদ্ধেশ্বৰ দুৱৰাৰ পুত্ৰ পুতুল দুৱৰা (৩৫) বুলি চিনাক্ত কৰা হৈছে।
