উত্তৰ কাছাৰ পাৰ্বত্য স্বায়ত্তশাসিত পৰিষদৰ নিৰ্বাচন অনুষ্ঠিত কৰাৰ বাবে স্বয়ং মুখ্য মন্ত্ৰী সৰ্বানন্দ সোণোৱালৰ দায়িত্বত থকা পাৰ্বত্য অঞ্চল বিভাগে ধন মোকলাই দিয়া নাই।
মুখ্য মন্ত্ৰীয়ে সু-শাসন (good governance) আৰু কঠোৰ পৰিশ্ৰমৰ কথা দোহাৰি অহাৰ বিপৰীতে ডিমা হাচাও জিলাৰ উপায়ুক্তই অসম ৰাজ্যিক নিৰ্বাচন আয়োগৰ সচিবলৈ ১৭ ফেব্ৰুৱাৰিত প্ৰেৰণ কৰা NCH/EL/DC-1/2017-18/6047-50 পত্ৰই বিপৰীত ছবি এখনহে স্পষ্ট কৰি দিছে।
২০১৮ চনত হ’ব লগা নিৰ্বাচন বাদেই ২০১৩ চনত হৈ যোৱা পৰিষদীয় নিৰ্বাচনৰ ধনো চৰকাৰে আজিলৈকে মুকলি কৰি দিয়া নাই বুলি জানিব পৰা গৈছে।
পত্ৰখনত কোৱা হৈছে যে ডিমা হাচাও উপায়ুক্তই ‘বহুবাৰ যোগাযোগ কৰাৰ পিছতো আজিলৈকে (পত্ৰ প্ৰেৰণৰ দিনালৈকে) অসম চৰকাৰৰ পাৰ্বত্য অঞ্চল বিভাগে পৰিষদখনৰ ২০১৩ চনৰ হৈ যোৱা নিৰ্বাচনৰ লগতে ২০১৮ চনত হ’ব লগা আহি থকা নিৰ্বাচন অনুষ্ঠিত কৰাৰ বাবে ধন মোকলাই দিয়া নাই।’
ৰাজ্যিক নিৰ্বাচন আয়োগে ‘সেয়ে ৰাজ্যিক নিৰ্বাচন আয়োগে জৰুৰীভাৱে বিষয়টো চৰকাৰক উত্থাপন কৰিব পাৰে’ আৰু ‘শীঘ্ৰে ধনৰ ব্যৱস্থা কৰাৰ বাবে বিষয়টো দিচপুৰৰ পাৰ্বত্য অঞ্চল বিভাগক’ প্ৰস্তাৱ কৰিব পাৰে বুলি উপায়ুক্তগৰাকীৰ পত্ৰত কোৱা হৈছে।
বৰ্তমানৰ ‘পৰিষদখনৰ কাৰ্য্যকাল ৩ জুনত শেষ হ’ব’ আৰু ‘পূৰ্বৰ দৰে ২৮ সমষ্টিতে’ পৰৱৰ্তী পৰিষদীয় নিৰ্বাচন চলিত বছৰৰ ‘মে’ মাহত অনুষ্ঠিত হ’ব লাগে’ বুলি উল্লেখ কৰি উপায়ুক্তগৰাকীয়ে কোৱা অনুসৰি ‘নিয়মমতে ভোটাৰ তালিকাৰ কাম ২২ মাৰ্চৰ পৰা আৰম্ভ কৰিব পাৰি’।
জিলা উপায়ুক্তগৰাকীয়ে ৰাজ্যিক নিৰ্বাচন আয়োগৰ বিবেচনাৰ্থে এখন খচৰা নিৰ্বাচনী সূচীও প্ৰস্তুত কৰিছে। এই তালিকাত চূড়ান্ত ভোটাৰ তালিকা প্ৰকাশৰ দিন হিচাপে ২৩ এপ্ৰিল, মনোনয়ন দাখিলৰ দিন হিচাপে ৩০ এপ্ৰিলৰ পৰা ৬ মে’, ভোটদানৰ দিন হিচাপে ১৯ মে’ আৰু ২৪ মে’ক ভোট গণনাৰ দিন হিচাপে প্ৰস্তাৱ কৰা হৈছে।
উপায়ুক্তগৰাকীৰ এই পত্ৰ অসম চৰকাৰৰ পাৰ্বত্য অঞ্চল বিভাগ আৰু বিত্ত বিভাগৰ আয়ুক্ত আৰু সচিবৰ লগতে উত্তৰ কাছাৰ পাৰ্বত্য পৰিষদৰ মুখ্য সচিবৰ ‘জ্ঞাতাৰ্থে আৰু যাৱতীয় ব্যৱস্থা গ্ৰহণৰ বাবে’ প্ৰেৰণ কৰা হৈছে।
