ফিনলেণ্ডৰ টেম্পৰেত অনুষ্ঠিত বিশ্ব এথলেটিকচ চেম্পিয়নশ্বিপৰ অনুৰ্ধ্ব ২০ ৰ ৪০০ মিটাৰ দৌৰ শাখাত স্বৰ্ণপদক অৰ্জনেৰে দেশবাসী লৈ গৌৰৱ কঢ়িয়াই অনা দৌৰবিদ হিমা দাসৰ জন্মগাঁও ধিঙৰ ৩ নং কান্ধুলিমাৰীত প্ৰতিদিনেই বিৰাজ কৰিছে এক উদুলি-মুদুলি পৰিবেশে।
আনহাতে, দেশ তথা ৰাজ্যৰ ৰাজনৈতিক নেতা, বিভিন্ন ক্ষেত্ৰৰ আগৰণুৱা ব্যক্তিৰ নিতৌ আগমণ ঘটিছে হিমাৰ পিতৃ-মাতৃক সাক্ষাৎ কৰি অভিনন্দন জনোৱাৰ উদ্দেশ্যে।
আছাম এডভোকেট ফ’ৰামৰ প্ৰতিনিধি আৰু শ্ৰীমন্ত শংকৰদেৱ সংঘৰ প্ৰতিনিধিও উপস্থিত হয় হিমাৰ বাসগৃহত। স্বৰ্ণৰাণী হিমা দাসৰ বাসগৃহত কালি শ্ৰীমন্ত শংকৰদেৱ সংঘৰ প্ৰতিনিধি উপস্থিত হৈ হিমাৰ পিতৃ-মাতৃক শৰাই, গামোচাৰে সম্বৰ্ধনা জনায়।
ইপিনে, হিমা দাসৰ বাসগৃহত শনিবাৰে আছাম এডভোকেট ফ’ৰামৰ প্ৰতিনিধি বৰ্গ উপস্থিত হৈ হিমাই কঢ়িয়াই অনা সাফল্যৰ বাবে পিতৃ-মাতৃক অসমীয়াৰ স্বাভিমান গামোচা, শৰাই আৰু সম্বৰ্ধনা পত্ৰৰে অভিনন্দন জনায়।
উল্লেখ্য যে, আছাম এডভোকেট ফ’ৰামৰ সভাপতি আব্দুল হাচিম খণ্ডকাৰ, সম্পাদক মতিউৰ ৰহমান প্ৰমুখ্যে নগাঁও-মৰিগাঁও জিলাৰ বহু কেইগৰাকী অধিবক্তা হিমা দাসৰ ঘৰত উপস্থিত হয়।
