‘’আমাৰ চৰকাৰে সকলো জাতি-জনগোষ্ঠীৰ মহিলাসকলক লৈ আগবাঢ়ি যোৱাৰ প্ৰচেষ্টা হাতত লৈছে আৰু ৰাজ্যখনত ৯খনকৈ সংখ্যালঘু কন্যা মহাবিদ্যালয় স্থাপনৰ সিদ্ধান্ত লৈছে। ইয়াৰে ভিতৰত দুখন কন্যা মহাবিদ্যালয় স্থাপন কৰা হ’ব ধুবুৰীত,’’- এই মন্তব্য মুখ্যমন্ত্ৰী সৰ্বানন্দ সোণোৱালৰ।
অসম কন্যা হিমাই বিশ্ব জয় কৰি যি উদাহৰণ দেখুৱালে সেয়াই আমাৰ আই মাতৃ আৰু যুৱতীসকলৰ বাবে প্ৰেৰণা হ’ব লাগে। বিজেপি নেতৃত্বাধীন ৰাজ্য আৰু কেন্দ্ৰৰ এন ডি এ চৰকাৰে মহিলাসকলৰ উত্তৰণ কামনা কৰিছে। মহিলাসকলৰ উত্তৰণ ঘটিলেহে ৰাজ্যখন আগুৱাই যাব পাৰিব।
শনিবাৰে আবেলি ধুবুৰী জিলাৰ গোলকগঞ্জ বিধানসভা সমষ্টিৰ হালাকুৰা উচ্চতৰ মাধ্যমিক বিদ্যালয় প্ৰাংগনত অসম ৰাজ্যিক গ্ৰামীণ জীৱিকা অভিযান, পঞ্চায়ত আৰু গ্ৰামোন্নয়ন বিভাগৰ উদ্যোগত অনুষ্ঠিত হোৱা কনকলতা মহিলা সবলীকৰণৰ মহিলা সমাৰোহ অনুষ্ঠানত মুখ্য অতিথি হিচাপে উপস্থিত থাকি মুখ্যমন্ত্ৰীগৰাকীয়ে নিজৰ ভাষণত মহিলাৰ সবলীকৰণৰ ওপৰত বিশেষ গুৰুত্ব প্ৰদান কৰি কয় যে মহিলাসকল পুৰুষতকৈ কোনোগুণেই কম নহয়। আনকি মহিলাসকলৰ লগত পুৰুষৰ তুলনা নহয় বুলিও উল্লেখ কৰে মুখ্যমন্ত্ৰীগৰাকীয়ে।
উল্লেখ্য যে চৰকাৰে ধুবুৰী জিলাখনৰ মুঠ ৬ হেজাৰ ৩৭২টা আত্মসহায়ক গোটকে ধৰি ৰাজ্যৰ প্ৰতিখন জিলাৰ মুঠ ১ লাখ ২৬ হেজাৰ আত্মসহায়ক গোটক মুঠ ২৫ হেজাৰ টকাকৈ মুঠ ১০.৫৪ কোটি টকা এককালীন সাহায্য প্ৰদানৰ সিদ্ধান্ত গ্ৰহণ কৰিছে।এই কথা উল্লেখ কৰি মুখ্যমন্ত্ৰীগৰাকীয়ে লগতে কয়, ‘’ৰাজ্যৰ আত্মসহায়ক গোটসমূহৰ ভিতৰত যি গোটে ভাল পাৰদৰ্শিতা দেখুৱাবলৈ সক্ষম হ’ব সেই গোটক প্ৰথম পুৰস্কাৰ হিচাপে ৫ লাখ, দ্বিতীয় পুৰস্কাৰ হিচাপে ৩ লাখ আৰু তৃতীয় পুৰস্কাৰ হিচাপে ২ লাখ টকাকৈ পুৰস্কাৰ দিয়া হ’ব।’’ আনহাতে, প্ৰতিটো গোটক পৰ্যায়ক্ৰমে ৫ লাখ টকাকৈ বেংকৰ ঋণ দিয়াৰ ব্যৱস্থা কৰা হৈছে বুলিও সদৰী কৰে মুখ্যমন্ত্ৰীগৰাকীয়ে।
আনহাতে, মুখ্যমন্ত্ৰীয়ে তেওঁৰ ভাষণত এন আৰ চিৰ প্ৰসংগ উত্থাপন কৰি স্বচ্ছতাৰে এন আৰ চিৰ কাম কৰি থকা হৈছে যদিও একাংশ ৰাজনৈতিক দলৰ নেতাই বিভিন্ন সময়ত সাম্প্ৰদায়িক মন্তব্য প্ৰদান কৰি ৰাইজৰ মাজত বিভ্ৰান্তিৰ সৃষ্টি কৰি আহিছে বুলি কৈ ৰাইজক কোনো কথাতে গুৰুত্ব প্ৰদান নকৰিবলৈ আহ্বান জনায়।
মুখ্যমন্ত্ৰীয়ে ৰাজ্যিক বিজেপিৰ সভাপতি ৰঞ্জিত কুমাৰ দাস, খাদ্য আৰু যোগান বিভাগৰ মন্ত্ৰী ফণীভূষণ চৌধুৰী, মন্ত্ৰী নৱ কুমাৰ দলে, বিজেপি বিধায়ক অশ্বিনী ৰায় সৰকাৰ, অশোক সিংভী, এ আই ইউ ডি এফৰ বিধায়ক হাফিছ বছিৰ আহমেদ কাছিমী আৰু নিজানুৰ ৰহমান, ধুবুৰী জিলা উপায়ুক্ত অনন্তলাল জ্ঞানীৰ লগতে জিলাখনৰ শীৰ্শ বিষয়া তথা আন কেইবাগৰাকী সমাজকৰ্মীৰ উপস্থিতিত শনিবাৰে জিলাখনৰ ছটাকৈ আত্মসহায়ক গোটক ২৫হেজাৰ টকাকৈ এককালীন চেক প্ৰদান কৰি আঁচনিখনৰ শুভাৰম্ভ কৰে।
