বিজেপি উত্থাপিত নাগৰিকত্ব বিধেয়কক লৈ ব্ৰহ্মপুত্ৰ আৰু বৰাক উপত্যকাৰ মাজত প্ৰচণ্ড মত বিৰোধ চলি থকাৰ মাজতে আজি ১১ জুলাইত চূড়ান্তভাৱে উত্থাপিত হ’ল সুকীয়া বৰাকৰ প্ৰস্তাৱ।
বৰাকৰ অতি প্ৰভাৱশালী ৰাজনৈতিক ব্যক্তিত্ব, সদৌ কাচাৰ-কৰিমগঞ্জ-হাইলাকান্দি ছাত্ৰ সন্থা চমুকৈ অকছাৰ প্ৰাক্তন প্ৰতিষ্ঠাপক সভাপতি প্ৰদীপ দত্ত ৰয়ে উত্থাপন কৰিছে ৰাজ্য জোঁকাৰি যোৱা পৃথক বৰাকৰ এই প্ৰস্তাৱ।
‘ব্ৰহ্মপুত্ৰ উপত্যকাৰ বুদ্ধিজীৱী, ছপা আৰু বৈদ্যুতিন সংবাদ মাধ্যম আৰু বিভিন্ন দল-সংগঠনে দিনৰ পাছত দিন ধৰি বৰাক উপত্যকাৰ লোকসকলক বিদ্ৰুপ কৰি আহিছে’ বুলি দাবী কৰি দত্ত ৰয়ে উত্থাপন কৰিছে পুনৰ অসম বিভাজনৰ এই ভয়াৱহ প্ৰস্তাৱ। ‘ব্ৰহ্মপুত্ৰ উপত্যকাৰ মানুহবিলাকে দক্ষিণ অসমবাসীৰ অস্তিত্বকেই আক্ৰমণ কৰিছে। এইখন ৰাজ্যৰ পৰা পৃথক হৈ যোৱাটোৱেই এই অসন্মানজনক অৱস্থাৰ একমাত্ৰ শান্তিপূৰ্ণ সমাধান,’ দত্ত ৰয়ৰ প্ৰস্তাৱ।
আনহাতে ‘বিজেপি দলৰ দৃষ্টিভংগি অতি স্পষ্ট’ বুলি বিজেপি দল-চৰকাৰৰ প্ৰশংসাত পঞ্চমুখ হৈ দত্ত ৰয়ে কয় ‘অঞ্চলটোক সুকীয়া ৰাজ্যৰ মৰ্যাদা প্ৰদান কৰিলে আৰু অধিক ভাল হয়।’
বৰাক উপত্যকাত অসমীয়া ভাষাক চৰকাৰী ভাষা হিচাপে অনুমোদন কৰিবলৈ অসম সাহিত্য সভাই দিয়া প্ৰস্তাৱৰ বিৰুদ্ধেও যুযুধান অৱস্থান লৈ বৰাকৰ প্ৰভাৱশালী নেতা তথা অধিবক্তাজনে ঘোষণা ‘অসম সাহিত্য সভাৰ সভাপতি ড০ পৰমানন্দ ৰাজবংশী মূৰ্খ’।
‘আমি এই কৰ্তৃত্ব মানি ল’ব নোৱাৰোঁ। বাংলা বৰাকৰ চৰকাৰী ভাষা। তেওঁ মূৰ্খ। নহ’লে তেওঁ নাজানে যে ১৯৬১ চনত আমি যুদ্ধ কৰিছিলোঁ এই ভাষা প্ৰতিষ্ঠা কৰাৰ বাবে,’ দত্ত ৰয়ৰ হুংকাৰ।
অসম বিশ্ববিদ্যালয়ৰ প্ৰাক্তন উপাচাৰ্য ড০ তপোধীৰ ভট্টাচাৰ্যৰ বিৰুদ্ধে কেইদিনমান আগতে গুৱাহাটীত ৰুজু হোৱা গোচৰটোৰ বিপক্ষে তেওঁ আইনী যুঁজ কৰি যাব বুলিও দত্ত ৰয়ে ঘোষণা কৰে।
উল্লেখযোগ্য যে এই প্ৰদীপ দত্ত ৰয়েই ৰাষ্ট্ৰীয় নাগৰিক পঞ্জীৰ প্ৰক্ৰিয়াৰ পৰা বিচাৰক ৰঞ্জন গগৈক অপসাৰণ কৰাৰ বাবে আবেদন জনাই চলিত বৰ্ষৰ ২৬ মে’ত উচ্চতম ন্যায়ালয়ৰ মুখ্য ন্যায়াধীশলৈ পত্ৰ প্ৰেৰণ কৰিছিল।
