সোমবাৰে উত্তৰ প্ৰদেশত ভাৰত জোডো ন্যায় যাত্ৰাত ব্যস্ত হৈ থকাৰ সময়তে কংগ্ৰেছ নেতা ৰাহুল গান্ধীলৈ চমন জাৰি কৰিছে অসম আৰক্ষীৰ অপৰাধ অনুসন্ধান বিভাগে ।
খবৰ অনুসৰি কংগ্ৰেছৰ সাংসদগৰাকীক অহা ২৩ ফেব্ৰুৱাৰী (বৃহস্পতিবাৰ) গুৱাহাটীৰ উলুবাৰীস্থিত তেওঁলোকৰ কাৰ্যালয়ত চি আই ডিৰ সন্মুখত হাজিৰ হ’বলৈ কোৱা হৈছে।
ৰাহুল গান্ধীৰ লগতে কংগ্ৰেছৰ জ্যেষ্ঠ নেতা তথা দলৰ যোগাযোগ বিভাগৰ সাধাৰণ সম্পাদক জয়ৰাম ৰমেশ, কে চি ভেনুগোপাল, অসমৰ এ আই চি চিৰ ভাৰপ্ৰাপ্ত বিষয়া জিতেন্দ্ৰ সিং আলৱাৰকো চি আই ডিৰ সন্মুখত হাজিৰ হ’বলৈ নিৰ্দেশ দিয়া হৈছে।
ইয়াৰ উপৰিও যুৱ কংগ্ৰেছৰ ৰাষ্ট্ৰীয় সভাপতি বি ভি শ্ৰীনিবাস, আৰু এন এছ ইউ আইৰ প্ৰভাৰী কানহাইয়া কুমাৰকো চমন জাৰি কৰা হয়।
তদুপৰি অসম কংগ্ৰেছৰ মুৰব্বী ভূপেন বৰা, লোকসভাৰ সাংসদ গৌৰৱ গগৈ আৰু অসম বিধানসভাৰ বিৰোধী নেতা দেৱব্ৰত শইকীয়াকো চি আই ডিৰ সন্মুখত হাজিৰ হ’বলৈ নিৰ্দেশ দিয়া হৈছে।
তদুপৰি কংগ্ৰেছৰ বিধায়ক জাকিৰ হুছেইন ছিকদাৰ আৰু ৰমেন শৰ্মাকো গুৱাহাটীত চি আই ডিৰ সন্মুখত হাজিৰ হ’বলৈ নিৰ্দেশ দিয়া হৈছে।
উল্লেখ্য যে চলিত বৰ্ষৰ ১৮ জানুৱাৰীৰ পৰা অসমত আৰম্ভ হোৱা ভাৰত জোডো ন্যায় যাত্ৰাৰ সময়ত আৰক্ষীৰ বেৰিকেট ভাঙি দিয়াৰ অভিযোগত CID এ এই চমন জাৰি কৰিছে।
কংগ্ৰেছৰ ৰাজ্য আৰু ৰাষ্ট্ৰীয় এই সকলো নেতাক ২৩ ফেব্ৰুৱাৰীৰ পুৱা ১১:৩০ বজাত গুৱাহাটীৰ চি আই ডিৰ কাৰ্যালয়ত উপস্থিত থাকিবলৈ নিৰ্দেশ দিছে।
