সমগ্ৰ বিশ্বই ফুটবল বিশ্বকাপক লৈ মতলীয়া হৈ থকাৰ সময়তে অসমৰ সংগীত জগতৰ নক্ষত্ৰ জুবিন গাৰ্গেও ৰাছিয়াত উপস্থিত হৈ উপভোগ কৰিলে ফুটবল বিশ্বকাপৰ মাদকতা।
হাজাৰ হাজাৰ দৰ্শকৰ উপস্থিতিত জুবিন গাৰ্গে মূৰত অসমীয়াৰ স্বাভিমান গামোচা লৈ বৃহস্পতিবাৰে উপভোগ কৰিলে আৰ্জেণ্টিনা-ক্ৰ’ৱেচিয়াৰ মাজৰ হাইভল্টেজ মেচখন।
উল্লেখ্য যে যোৱা ১৮ জুনত ফুটবল বিশ্বকাপ উপভোগ কৰাৰ উদ্দেশ্যে জুবিন আৰু তেওঁৰ সতীৰ্থ কেইজনমানে উৰা মাৰিছিল সদূৰ ৰাছিয়ালৈ। আৰু ৰাছিয়াত উপস্থিত হৈয়ে জুবিন আৰু তেওঁৰ সতীৰ্থসকলে অসমৰ জাতীয় চিনাকী গামোচা আৰু জয় আই অসম সম্বলিত জাৰ্চী পৰিধান কৰি ফুটবল উপভোগ কৰা দৃশ্য ছ’চিয়েল মিডিয়াযোগে ভাইৰেল হৈ পৰিছে।
মনকৰিবলগীয়া যে ফুটবলৰ নামত সদায় উদ্বাউল হৈ থকা জুবিনে বিগত চাৰিটা দিনত ৰাছিয়াত ফুটবল উপভোগ কৰাৰ উপৰি ৰাছিয়ান সংগীতৰো সুবাস লোৱা বুলি জানিব পৰা গৈছে।
