তিনিচুকীয়া জিলাৰ সমীপৱৰ্তী অৰুণাচল প্ৰদেশৰ চাংলাং জিলাৰ লংচংবস্তিত আজি অসম ৰাইফলছ আৰু সন্দেহজনক এন এছ চি এন (আই এম) উগ্ৰপন্থীৰ মাজত প্ৰচণ্ড সংঘৰ্ষ সংঘটিত হয়।
সেনাৰ এক সূত্ৰৰ পৰা জানিব পৰা মতে, গোপন সূত্ৰৰ পৰা অসম ৰাইফলছৰ দলে চাংলাং জিলাৰ নামপং থানাৰ অন্তৰ্গত লংচং বস্তিত নাগা উগ্ৰপন্থীৰ দলে বিচৰণ কৰি থকাৰ খবৰ লাভ কৰি আজি অঞ্চলটোত এক অভিযান চলায়।
অভিযানকালত উগ্ৰপন্থীৰ দলটোৱে সেনালৈ উদ্দেশ্যি ধাৰাসাৰ গুলীচালনা কৰাত প্ৰত্যুত্তৰত সেনায়ো গুলীবৰ্ষণ কৰে বুলি সূত্ৰটোৱে জানিবলৈ দিয়ে। অৱশ্যে গুলীচালনা কৰা এন এছ চি এনৰ দলটো সেই স্থানৰ পৰা পলায়ন কৰিবলৈ সক্ষম হয়।
উল্লেখযোগ্য যে নামপং থানাৰ অন্তৰ্গত লংচংবস্তি অঞ্চলটোত এন এছ চি এন (আই এম)ৰ আধিপত্য আছে বুলি জনা যায়, যাৰ পৰিপ্ৰেক্ষিতত উগ্ৰপন্থীৰ দলটোক এন এছ চি এন (আই এম) ৰ বুলি সন্দেহ কৰা হৈছে।