অসম মহিলা বিশ্ববিদ্যালয়ৰ বিষয়টোত এটা গুৰুত্বপূৰ্ণ মোৰ দি আজি অসম বিধানসভাৰ অধ্যক্ষ তথা যোৰহাটৰ স্থানীয় বিধায়ক হিতেন্দ্ৰ নাথ গোস্বামীয়ে বিশ্ববিদ্যালয়খনৰ মৰ্য্যাদা বাতিল কৰিবলৈ ওলোৱাৰ প্ৰতিবাদ চলাই থকা ছাত্ৰীসকলৰ সৈতে এখন বৈঠকত মিলিত হয়।
আজি যোৰহাট আৱৰ্ত ভৱনত অধ্যক্ষজনে অসম মহিলা বিশ্ববিদ্যালয়ৰ ১২ গৰাকী ছাত্ৰী আৰু সদৌ অসম ছাত্ৰ সন্থাৰ ৮জন প্ৰতিনিধিৰ সৈতে এই বৈঠকৰ আয়োজন কৰিছিল। বৈঠকত অধ্যক্ষজনে অসম মহিলা বিশ্ববিদ্যালয়খনক এখন পূৰ্ণ পৰ্য্যায়ৰ বিশ্ববিদ্যালয় হিচাপে মৰ্য্যাদা অটুট ৰখাৰ প্ৰতিশ্ৰুতি দিয়ে।
“মই ইতিপূৰ্বেই অসম বিধানসভাৰ মজিয়াত কৈছো যে মহিলা বিশ্ববিদ্যালয়খন সুৰক্ষিত ৰখা হ’ব, আৰু মই মোৰ কথা নেপেলাওঁ। কিন্তু উপাচাৰ্য্য নিযুক্তি দিয়া প্ৰক্ৰিয়াটো অলপ পলম হ’ব। মই তোমালোকক শ্ৰেণীকোঠালৈ ঘূৰি যাবলৈ অনুৰোধ জনাইছো আৰু আমি সোনকালেই প্ৰক্ৰিয়াটো আৰম্ভ কৰিম।” এইদৰে কয় অধ্যক্ষজনে।
অধ্যক্ষজনে লগতে কয় যে যোগ্যতা নিৰূপক প্ৰমাণপত্ৰবোৰৰো (qualification certificates) বৈধতা থাকিব।
“আমি অধ্যক্ষজনৰ প্ৰতিশ্ৰুতিত পতিয়ন গৈছো আৰু বিহুৰ পিছৰ পৰা ক্লাছবোৰ কৰিম। আমি আশা কৰো যে মে’ মাহৰ শেষৰফালে এজন উপাচাৰ্য্য নিযুক্তি দিয়া হ’ব।” এগৰাকী ছাত্ৰীয়ে কয়।
উল্লেখযোগ্য যে একমাত্ৰ মহিলাৰ বাবে থকা উত্তৰ-পূৰ্বাঞ্চলৰ একমাত্ৰ মহিলা বিশ্ববিদ্যালয়খনৰ বিশ্ববিদ্যালয়ৰ মৰ্য্যাদা বাতিল কৰি এখন কাৰিকৰী প্ৰতিষ্ঠান কৰা হ’ব বুলি স্বয়ং শিক্ষা মন্ত্ৰী ড০ হিমন্ত বিশ্ব শৰ্মাই ঘোষণা কৰাৰ পিছত অসম মহিলা বিশ্ববিদ্যালয়ৰ ছাত্ৰীসকলে যোৱা এমহাতকৈ অধিক দিন ধৰি শ্ৰেণী বৰ্জন কৰি প্ৰতিবাদী কাৰ্য্যসূচী ৰূপায়ণ কৰি আহিছিল। যোৱা ১৯ মাৰ্চৰ পৰা অনশন ধৰ্মঘট পালন কৰি আহিছিল ছাত্ৰীসকলে।
মন কৰিব লগীয়া কথাটো হ’ল কংগ্ৰেছ চৰকাৰৰ দিনতো শিক্ষা মন্ত্ৰীৰ দায়িত্বত থকা বৰ্তমানৰ শিক্ষা মন্ত্ৰীজনেই অসম মহিলা বিশ্ববিদ্যালয় আইন, ২০১৩ (Women’s University Act) প্ৰণয়ন কৰি এই বিশ্ববিদ্যালয়খন নিজেই প্ৰতিষ্ঠাৰ ব্যৱস্থা কৰিছিল। যোৰহাট নগৰৰ ৰৰৈয়াস্থিত এই বিশ্ববিদ্যালয়খনৰ পৰা ইতিপূৰ্বে দুটা বেচ্ছৰ ছাত্ৰীয়ে উত্তীৰ্ণ হৈ বিভিন্ন ঠাইত চাকৰি কৰি আছে। তেনে অৱস্থাত হঠাৎ শিক্ষা মন্ত্ৰীজনে বিশ্ববিদ্যালয়খনৰ উপযুক্ত মৰ্য্যাদা নাই আৰু এইখনে দিয়া প্ৰমাণপত্ৰবোৰৰো বৈধতা নাই বুলি ঘোষণা কৰি ৰাজ্যৰ শৈক্ষিক পৰিৱেশটোকে অস্থিৰ কৰি তুলিছিল।
শিক্ষা মন্ত্ৰীজনৰ এই সিদ্ধান্তৰ প্ৰতিবাদ ৰাজ্যৰ চাৰিওফালে হোৱাৰ লগতে বিশ্ববিদ্যালয়খনৰ ছাত্ৰী গোট, আছু, ছাত্ৰ মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদ, এছ এফ আই আদিয়ে ধাৰাবাহিক প্ৰতিবাদ কৰিছিল। ৰাজ্যজুৰি প্ৰতিবাদৰ ৰূপ দেখি অৱশেষত চৰকাৰে নিজৰ স্থিতি সলনি কৰে। বিধানসভাৰ মজিয়াতো এই বিষয়টোক লৈ বাদ-বিবাদ হোৱা দেখা গৈছিল।
