অসমৰ তথা উত্তৰ-পূৰ্বাঞ্চলৰ অন্যতম তথা বৃহত্তম সাহিত্যানুষ্ঠান অসম সাহিত্য সভাৰ ৭৪সংখ্যক পূৰ্ণাংগ অধিৱেশনখন আজিৰ পৰা আৰম্ভ হৈছে। অসম-অৰুণাচলৰ সীমামূৰীয়া তিনিচুকীয়া জিলাৰ বৰডুমচাত এই অধিৱেশন অনুষ্ঠিত হৈছে।
বৰডুমচাৰ লগতে স্থানীয় লোকৰ অনুৰোধ মৰ্মে মূল মণ্ডপ থকা স্থানৰ পৰা প্ৰায় ৭ কিলোমিটাৰ দূৰৰ বুঢ়ীদিহিং পথাৰতো অধিৱেশনৰ এটা অংশ অনুষ্ঠিত কৰাৰ ব্যৱস্থা কৰা হৈছে। ফলত দুটা স্থানলৈ প্ৰসাৰিত হৈছে অধিৱেশন। সমগ্ৰ অঞ্চলটো চিংফৌ ঐতিহ্যৰ বাবে সুখ্যাত তথা পৰ্য্যটনৰ দিশেদি অতি গুৰুত্বপূৰ্ণ।
এই পটভূমিত অধিৱেশন লোকাৰণ্যত পৰিণত হোৱাৰ আশা ৰাখিছে আয়োজকে। আনহাতে অৰুণাচল প্ৰদেশৰ সীমামূৰীয়া স্থান হোৱা বাবে অধিৱেশন চুবুৰীয়া ৰাজ্যখনৰ পৰাও যথেষ্ট সংখ্যক লোক অহাৰ সম্ভাৱনা আছে। অসমীয়া ভাষা আৰু সাহিত্যত অৰুণাচলী পাঠক-লেখক-সাহিত্যিকৰ সবল অস্তিত্ব আছে তাহানিৰ দিনৰ পৰাই। য়েছে দৰজে ঠংছি, লুম্বেৰ দাইকে ধৰি বহুকেইজন লেখক-সাহিত্যিকে অসমীয়া ভাষা-সাহিত্যক সমৃদ্ধ কৰিছে তেওঁলোকৰ চৰ্চাৰ জৰিয়তে।এনে এটা পৃষ্ঠভূমিত অসম-অৰুণাচলৰ সীমান্তত হোৱা অসম সাহিত্য সভাৰ ৭৪ সংখ্যক বুঢ়ীদিহিং-বৰডুমচা অধিৱেশনখন সমন্বয়ৰো প্ৰতীক হৈ পৰিব পাৰে।
আনহাতে আয়োজকে এইবাৰ মুল অধিৱেশনস্থলীৰ নাম দিছে বদৌচা সমন্বয় ক্ষেত্ৰ। ঐতিহাসিক তথ্যমতে আহোমসকলৰ অসমলৈ অহাৰ সময়ত সৌমাৰ খণ্ডত (উজনি অসম) শাসন কৰিছিল মৰাণসকলে। বদৌচা আছিল সেইসময়ৰ মৰাণ ৰজা। চ্যুকাফাই বৈবাহিক সূত্ৰে বদৌচাৰ সৈতে মিত্ৰতা স্থাপন কৰিছিল।
বদৌচা সমন্বয় ক্ষেত্ৰৰ উপৰি চিংফৌ ঐতিহ্যক দাঙি ধৰি শ্বপং-য়ং হেৰিটেইজ ভিলেইজ নিৰ্মাণ কৰা হৈছে।
উল্লেখযোগ্য যে এইবাৰৰ অধিৱেশনৰ সভাপতি নিৰ্বাচিত হৈছে ড০ পৰমানন্দ ৰাজবংশী। আজিৰ পৰা আৰম্ভ হোৱা এই অধিৱেশ অন্ত পৰিব অহা ৪ ফেব্ৰুৱাৰিত।
