গুৱাহাটীৰ চানমাৰিস্থিত অসম অভিযান্ত্ৰিক প্ৰতিষ্ঠানৰ খেলপথাৰত অহা ২২ ডিচেম্বৰৰ পৰা ২ জানুৱাৰিলৈ অসম প্ৰকাশনৰ উদ্যোগত অনুষ্ঠিত কৰা হ’ব ৩১তম গুৱাহাটী গ্ৰন্থমেলা। এই কথা জনাইছে অসম প্ৰকাশন পৰিষদৰ সচিব প্ৰমোদ কলিতাই। অসমৰ বিভিন্ন ঠাইৰ ৮০ টাতকৈ অধিক প্ৰকাশনগোষ্ঠী আৰু গ্ৰন্থ বিপণিৰ লগতে দিল্লী, হিমাচল প্ৰদেশ, পশ্চিম বংগ ,বিহাৰ আৰু ঢাকাৰ পৰাও ভালেমান গ্ৰন্থবিপণি আহিব বুলি জানিবলৈ দিয়ে শ্ৰী কলিতাই। উল্লেখযোগ্য যে এইবাৰ গ্ৰন্থমেলাত গ্ৰন্থপ্ৰেমী তথা ক্ৰেতাৰ বাবে প্ৰৱেশ বিনামূলীয়া হ’ব বুলি জনাইছে আয়োজকে। আনহাতে গ্ৰন্থমেলাৰ সৈতে সমান্তৰালভাৱে বিভিন্ন সাহিত্য-সংস্কৃতিৰ সৈতে সম্পৰ্ক থকা কাৰ্য্যসূচী লোৱা হৈছে। শ্ৰীলংকাৰ জে বি ডিছানায়েকে, পশ্চিমবংগৰ ৰন্জু বন্দোপধ্যায়, বিনোদ খোচাল, হিমাচল প্ৰদেশৰ কুলদীপ অগ্নিহোত্ৰী, উৰিষ্যাৰ ৰুচী পাটনায়ক, অৰুণাচল প্ৰদেশৰ য়েছে দৰ্জে ঠংচিৰ দৰে প্ৰখ্যাত লেখক-সাহিত্যিকে বিভিন্ন আলোচনাত অংশগ্ৰহণ কৰাৰ কথা।
আনহাতে স্কুল, কলেজৰ ছাত্ৰ-ছাত্ৰীসকলৰ বাবে বিশেষ প্ৰদৰ্শনীৰো ব্যৱস্থা কৰা হ’ব বুলি জনাইছে শ্ৰী কলিতাই। ইয়াৰ ভিতৰত জ্যেতি চিত্ৰবনৰ উদ্যেগত প্ৰথমবাৰৰ বাবে শিল্পীসকলৰ বাবে আড্ডা আৰু সাংস্কৃতিক সন্ধিয়াৰ আয়োজন কৰা হ’ব বুলি প্ৰকাশন পৰিষদে জানিবলৈ দিয়ে। প্ৰত্যেক দিনৰ বিভিন্ন ধৰণৰ সাংস্কৃতিক অনুষ্ঠানৰ উপৰি গ্ৰন্থমেলাত বৰাক উৎসৱ হ’ব এক ব্যতিক্ৰমী অনুষ্ঠান।
৩১তম গুৱাহাটী গ্ৰন্থমেলাত ২০ খনতকৈ অধিক গ্ৰন্থৰ উপৰি হেমবৰুৱাৰ ৰচনাৱলী আৰু নিৰ্মলপ্ৰভা বৰদলৈৰ ৰচনাৱলী উন্মোচন কৰা হ’ব বুলিও আয়োজকে জানিবলৈ দিছে।
