লোকসভা নিৰ্বাচন ২০২৪ৰ চাৰিটা পৰ্যায়ৰ অন্তত আজি অনুষ্ঠিত হৈছে পঞ্চম পৰ্যায়ৰ নিৰ্বাচন। লোকসভাৰ পঞ্চম পৰ্যায়ৰ ভোটগ্ৰহণ পুৱাৰে আৰম্ভ হৈছে। আজি ৮খন ৰাজ্য আৰু কেন্দ্ৰীয় শাসিত অঞ্চলৰ ৪৯টা সংসদীয় সমষ্টিত ভোটগ্ৰহণ অনুষ্ঠিত হৈছে। ইয়াৰ উপৰিও ওড়িশা বিধানসভাৰ ৩৫খন বিধানসভাৰ আসনৰ বাবেও একেলগে ভোটগ্ৰহণ অনুষ্ঠিত হৈছে।
এই পৰ্যায়ত ভোটগ্ৰহণ চলা ৮খন ৰাজ্য আৰু কেন্দ্ৰীয় শাসিত অঞ্চল হ’ল বিহাৰ, জম্মু-কাশ্মীৰ, লাডাখ, ঝাৰখণ্ড, মহাৰাষ্ট্ৰ, ওড়িশা, উত্তৰ প্ৰদেশ আৰু পশ্চিম বংগ। নিৰ্বাচন আয়োগে এই ৰাজ্যসমূহত সুস্থ আৰু নিকা ভোটগ্ৰহণ অনুষ্ঠিত কৰাৰ বাবে সকলো ধৰণৰ প্ৰস্তুতি চলাইছে।
আজি পুৱা ৭ বজাৰ পৰা আৰম্ভ হৈছে ভোটদান প্ৰক্ৰিয়া আৰু সন্ধিয়া ৬ বজাত সামৰণি পৰিব। পঞ্চম পৰ্যায়ত উত্তৰ প্ৰদেশৰ ১৪খন, মহাৰাষ্ট্ৰৰ ১৩খন আসন, পশ্চিম বংগৰ ৭খন আসন, বিহাৰৰ ৫খন আসন, ওড়িশাৰ ৫খন আসন, ঝাৰখণ্ডৰ ৩খন আসন আৰু লাডাখ আৰু জম্মু- কাশ্মীৰৰ এখনকৈ আসনত ভোটগ্ৰহণ অনুষ্ঠিত হ’ব।
লগতে পঢ়কঃ বাংগালুৰু প্লে অফত প্ৰৱেশৰ লগে লগে মুখ উলিয়ালে মালিয়াই; কোহলীৰ দলক বাৰ্তা ‘পলাতক’ প্ৰাক্তন মালিকৰ
পঞ্চম পৰ্যায়ৰ নিৰ্বাচনৰ বাবে প্ৰতিদ্বন্দ্বিতা আগবঢ়াইছে ৬৯৫ গৰাকী প্ৰাৰ্থীয়ে। পঞ্চম পৰ্যায়ৰ কেইজনমান তাৰকা প্ৰাৰ্থীৰ ভিতৰত আমেথি আসনৰ পৰা কেন্দ্ৰীয় মন্ত্ৰী স্মৃতি ইৰাণী, ৰায়বেৰেলী আসনৰ পৰা কংগ্ৰেছ নেতা ৰাহুল গান্ধী, আৰজেডি নেতা তথা দলৰ মুৰব্বী আৰু প্ৰাক্তন মন্ত্ৰী লালু প্ৰসাদৰ কন্যা, লক্ষ্ণৌৰ পৰা প্ৰতিৰক্ষা মন্ত্ৰী ৰাজনাথ সিং, বাৰামুল্লাৰ পৰা নেচনেল কনফাৰেন্সৰ ভাইচ প্ৰেছিডেন্ট ওমৰ আব্দুল্লা আৰু মুম্বাই উত্তৰৰ পৰা কেন্দ্ৰীয় মন্ত্ৰী পীয়ুষ গোৱালে প্ৰতিদ্বন্দ্বিতা আগবঢ়াইছে।
নিৰ্বাচন আয়োগৰ এক বিবৃতি অনুসৰি ভোটগ্ৰহণ কেন্দ্ৰসমূহত পৰ্যাপ্ত পৰিমাণৰ তম্বু, খোৱাপানী, ৰেম্প, শৌচাগাৰ আৰু অন্যান্য মৌলিক সা-সুবিধাৰ ব্যৱস্থা কৰি আৰামদায়ক আৰু সুৰক্ষিত পৰিৱেশত ভোটগ্ৰহণ নিশ্চিত কৰা হৈছে। সংশ্লিষ্ট চিইঅ’ আৰু ডিইঅ’ আৰু ৰাজ্যিক প্ৰশাসনসমূহক সেই অঞ্চলসমূহৰ গৰম বতৰৰ পৰিস্থিতি মোকাবিলাৰ বাবে পৰ্যাপ্ত ব্যৱস্থা গ্ৰহণ কৰিবলৈ পৰামৰ্শ দিয়া হৈছে।
লগতে পঢ়কঃ নিৰ্বাচনৰ মাজতে তৃণমূলত যোগদান কৰিলে বিজেপি সাংসদ কুনাৰ হেমব্ৰামে
এই পৰ্যন্ত ২০২৪ চনৰ লোকসভা নিৰ্বাচনৰ বাবে চাৰিটা পৰ্যায়ত অনুষ্ঠিত হৈ যোৱা ভোটগ্ৰহণত প্ৰায় ৬৬.৯৫% ভোটদান হৈছে। বাকী তিনিটা পৰ্যায়ৰ ভোটগ্ৰহণ ১ জুনলৈকে চলিব আৰু ৪ জুনত ভোটগণনা হ’ব। সাধাৰণ নিৰ্বাচনৰ প্ৰথম চাৰিটা পৰ্যায়ত ২৩খন ৰাজ্য আৰু কেন্দ্ৰীয় শাসিত অঞ্চল আৰু ৩৭৯টা লোকসভা সমষ্টিত ভোটগ্ৰহণ সম্পূৰ্ণ হৈছে।
