পশ্চিমবংগৰ ঝাৰগ্ৰামৰ বিদায়ী বিজেপি সাংসদ কুনাৰ হেমব্ৰামে তৃণমূলত যোগদান কৰিছে। দেওবাৰে অনুষ্ঠিত এক জনসভাত তেওঁ তৃণমূলৰ সৰ্বভাৰতীয় সাধাৰণ সম্পাদক অভিষেক বেনাৰ্জীৰ হাতৰ পৰা তৃণমূলৰ পতাকা তুলি লয়।
এইবাৰ বিজেপিয়ে লোকসভাত কুনাৰক টিকট নিদিলে। তেওঁলোকে মনোনীত কৰিছে চিকিৎসক প্ৰণত টুডুক।আনহাতে, কুনাৰে ইতিমধ্যে টিকট নোপোৱাত বিজেপিৰ পৰা পদত্যাগ কৰাৰ কথা ঘোষণা কৰিছিল। লগতে ঝাৰগ্ৰামত তৃণমূলৰ প্ৰাৰ্থী কালিপদ ছোৰেনৰ হৈ প্ৰচাৰ চলাব বুলিও কৈছিল। এইবাৰ কুনাৰে তৃণমূলত যোগদান কৰিলে।
যোৱা ৮ মাৰ্চত দলৰ পৰা আঁতৰি যোৱাৰ কথা ঘোষণা কৰিছিল কুনাৰে। তেওঁ বিজেপিৰ ৰাজ্যিক সভাপতি সুকান্ত মজুমদাৰলৈও এখন পত্ৰ লিখিছিল। ব্যক্তিগত কাৰণত দলৰ সৈতে সকলো সম্পৰ্ক বিচ্ছিন্ন কৰিব বিচাৰিছে বুলি জনাইছিল।
লগতে পঢ়কঃ ইৰাণত হেলিকপ্টাৰ দুৰ্ঘটনাত ‘সন্ধানহীন’ ৰাষ্ট্ৰপতি ইব্ৰাহিম ৰাইছি, বৈদেশিক মন্ত্ৰী আব্দুল্লাহিয়ান
দেওবাৰে ৬১ বছৰীয়া হেমব্ৰামে দলৰ ৰাষ্ট্ৰীয় সাধাৰণ সম্পাদক অভিষেক বেনাৰ্জীয়ে অনুষ্ঠিত তৃণমূলৰ এক সভাত দৰ্শকৰ কয়, ‘বিজেপি জনজাতি বিৰোধী দল। তেওঁলোকে জনজাতীয় জনগোষ্ঠীৰ অধিকাৰক স্বীকৃতি দিব নিবিচাৰে।’
বেনাৰ্জীয়ে কয়, ‘কুনাৰ হেম্ব্ৰামে এই বছৰবোৰত উপলব্ধি কৰিছিল যে বিজেপিয়ে কেতিয়াও মানুহৰ কল্যাণৰ বাবে কাম নকৰে।’
কুনাৰে আনুষ্ঠানিকভাৱে বিজেপি বা লোকসভাৰ পৰা পদত্যাগ কৰা নাছিল। অহা ২৫ মে’ত ষষ্ঠ পৰ্যায়ত অনুষ্ঠিত হ’ব ঝাৰগ্ৰাম আৰু আন ৭টা সমষ্টিত ভোটগ্ৰহণ।
লগতে পঢ়কঃ সোমবাৰে পঞ্চম পৰ্যায়ত ৪৯টা সমষ্টিত ভোটগ্ৰহণ; দৃষ্টি আকৰ্ষণ কৰা কোন কোন তাৰকা প্ৰাৰ্থী?
উল্লেখ্য যে বেনাৰ্জীয়ে হেমব্ৰামক আদৰণি জনোৱাৰ সময়তে মোদীয়ে ২০১৯ চনত বিজেপিয়ে দুয়োখন আসন লাভ কৰা বাংকুৰা জিলাৰ বিষ্ণুপুৰত এক সভাত ভাষণ দি আছিল। দেওবাৰে দুদিনীয়া ভ্ৰমণসূচীৰে ষষ্ঠ পৰ্যায়ত ভোটগ্ৰহণ হবলগীয়া পাঁচখন আসনৰ ভোটাৰক সম্বোধন কৰিবলৈ মোডী বংগত উপস্থিত হয়।
