অৰুণাচল প্ৰদেশৰ পাচিঘাটত ২৩ ফেব্ৰৱাৰীৰ পৰা তিনিদিনীয়া বৰ্ণাঢ্য কাৰ্যসূচীৰে মিচিং জনগোষ্ঠীৰ প্ৰধান উৎসৱ আলি আঃয়ে লৃগাং পালন কৰাৰ ব্যাপক প্ৰস্তুতি চলোৱা পৰিলক্ষিত হৈছে৷ উল্লেখ্য যে জনগোষ্ঠীটোৰ লোকসকলে সম্পূৰ্ণ পৰম্পৰাগত ভাৱে আলি আঃয়ে লৃগাং উৎসৱ পালন কৰিব৷ আলি আঃয়ে লৃগাং হ’ল মিচিং জনগোষ্ঠীৰ মূল কৃষিভিত্তিক উৎসৱ৷
প্ৰতি বছৰৰ ফাগুন মাহৰ প্ৰথমটো বুধবাৰে মিচিং জনগোষ্ঠীয়ে এই উৎসৱ পালন কৰে যদিও অৰুণাচলৰ আদি আৰু অসমৰ মিচিংসকলে পূব চিয়াং জিলাৰ পাচিঘাট মেবৰ বাক্কুলত চিয়াং নদীৰ পাৰৰ মনোমোহা পৰিৱেশৰ মাজত একতা সৃষ্টিৰ লক্ষ্যৰে পুনৰ এই উৎসৱৰ আয়োজন কৰিছে।
এই উৎসৱক লৈ অৰুণাচল প্ৰশাসনে ব্যাপক প্ৰস্তুতি চলোৱা পৰিলক্ষিত হৈছে।
অসম-অৰুণাচলৰ প্ৰায় ৩০টা সাংস্কৃতিক দলে এই আলি আঃয়ে লৃগাং উৎসৱত অংশ গ্ৰহণ কৰিব বুলি জানিব দিছে মুখ্য পৃষ্ঠপোষক তথা মেব সমষ্টিৰ বিধায়ক লম্বু টায়েঙে৷ তিনিদিনীয়াকৈ অনুষ্ঠিত হ’বলগীয়া এই বৰ্ণাঢ্য উৎসৱত মিচিঙসকলৰ পৰম্পৰাগত খাদ্য সম্ভাৰৰ লগতে বস্ত্ৰ মেলাৰো আয়োজন কৰিছে।
আনহাতে অৰুণাচলৰ আদী যুৱক-যুৱতীসকল এই উৎসৱৰ বাবে দিনে-নিশাই সাংস্কৃতিক অনুশীলনত ব্যস্ত থকা পৰিলক্ষিত হৈছে৷
অৰুণাচলৰ আদি আৰু অসমৰ মিচিং জনগোষ্ঠীয় লোকসকলৰ মাজত সাংস্কৃতিক বিনিময় গঢ়ি উঠাৰ লক্ষ্যৰে অনুষ্ঠিত কৰা এই আলি আঃয়ে লৃগাং উৎসৱৰ অনুষ্ঠানত অংশ গ্ৰহণ কৰিব অৰুণাচলৰ মুখ্যমন্ত্ৰী পেমা খাণ্ডু আৰু অসমৰ মুখ্যমন্ত্ৰী সৰ্বানন্দ সোনোৱাল৷
