নাগা বিদ্ৰোহী গোট এন এছ চি এন (আই এম)ক এক মুখ্যম আঘাত হানি শুকুৰবাৰে অৰুণাচল প্ৰদেশৰ চাংলাং জিলাৰ জয়ৰামপুৰত নিৰাপত্তা বাহিনীয়ে নিষিদ্ধ ঘোষিত সংগঠনটোৰ দুগৰাকী দুৰ্ধৰ্ষ সদস্যক আটক কৰিবলৈ সক্ষম হয়।
ধৃত এন এছ চি এনৰ কেডাৰ দুজনক নতুন লংচং গাঁৱৰ বাসিন্দা খামচাং টিখাক ওৰফে মাইকেল আৰু বাবলু টিখাক বুলি চিনাক্ত কৰা হৈছে। এই কথা প্ৰকাশ কৰি কহিমাস্থিত প্ৰতিৰক্ষা মুখপাত্ৰ কলনেল চিৰঞ্জীত কোঁৱৰে আজি এক প্ৰেছ বিজ্ঞপ্তি যোগে জনায় যে ধৃত বিদ্ৰোহী দুজন চাংলাং জিলাৰ মিয়াও আৰু নামপং অঞ্চলকেটাত বলপূৰ্বক ধনদাবী কাৰ্য চলাই আহিছিল।
জেৰাৰ সময়ত দুয়োগৰাকীয়ে এন এছ চি এন (আই এম)ৰ সৈতে জড়িত থকাৰ কথা স্বীকাৰ কৰে।
প্ৰেছ বিজ্ঞপ্তিটোত লগতে উল্লেখ কৰা হয় যে যোৱা তিনিটা দিনত নিৰাপত্তা বাহিনীয়ে বিদ্ৰোহী গোটটোৰ বিৰুদ্ধে চলোৱা এইটো দ্বিতীয়টো অভিযান। যোৱা মঙলবাৰে চলোৱা এক যুটীয়া অভিযানত সংগঠনটোৰ তিনিটা মুখ্য শিবিৰ ধ্বংস হৈছিল বুলিও লগতে বিজ্ঞপ্তিটোত জনোৱা হয়।