আগাঠা ছাংমাৰ অভিযোগ সাংসদৰ দায়িত্ব সম্পৰ্কে অৱগত নহয় বিলিকিড ছাংমা
গাৰো পাহাৰৰ পৰা লোকসভা সাংসদ হিচাপে থকা সময়খিনিত একো কাম নকৰিলে বুলি বিজেপিৰ প্ৰাৰ্থী বিলিকিড এ ছাংমায়ে তোলা অভিযোগৰ বিৰুদ্ধে দক্ষিণ তুৰা সমষ্টিৰ এন পি পিৰ প্ৰাৰ্থী তথা প্ৰাক্তন কেন্দ্ৰীয় মন্ত্ৰী আগাঠা কে ছাংমা জাঙুৰ খাই উঠিছে।
বিজেপি প্ৰাৰ্থী তথা তেওঁৰ প্ৰতিদন্দী গৰাকীক ওভতি ধৰি আগাঠায়ে কয়, ‘মোৰ সন্মানীয় প্ৰতিদন্দী গৰাকীয়ে এগৰাকী সাংসদ বা এগৰাকী কেন্দ্ৰীয় মন্ত্ৰীৰ দায়িত্ব কি তাক বুজাত বিফল হৈছে। ৰাজ্যখনৰ এখন মন্ত্ৰী হিচাপে মোৰ দায়িত্ব আৰু অৱদান সম্পৰ্কত গাৰো পাহাৰৰ লোকসকল ভালকৈয়ে অৱগত।’
তেওঁ কয় যে য়ু পি এ চৰকাৰৰ দিনত এজন ৰাজ্যিক মন্ত্ৰী হিচাপে তেওঁ উত্তৰ-পূব তথা মেঘালয়ৰ লগতে দেশৰ বিভিন্ন স্থানত গ্ৰাম্য উন্নয়নৰ বিভিন্ন পদক্ষেপ লৈছিল।
গ্ৰামীণ বিকাশ মন্ত্ৰালয়ৰ ৰাজ্যিক মন্ত্ৰীৰ দায়িত্বত থাকোতে ভূ জল নিষ্কাশন সম্পৰ্কীয় তেওঁ কৰা কামৰ কথা উল্লেখ কৰি তেওঁ লগতে কয়, ‘এই ক্ষেত্ৰত আৰু বহু পদক্ষেপ লোৱাৰ প্ৰয়োজন আছে, এই ক্ষেত্ৰত প্ৰয়োজনীয় পৰামৰ্শ পালে জল সংৰক্ষণৰ কাৰ্যসূচীক মোৰ সমষ্টিৰ লগতে সমগ্ৰ ৰাজ্যখনত আগবঢ়াই নিব পাৰিম বুলি মই প্ৰতিশ্ৰুতিবদ্ধ।’
আসন্ন নিৰ্বাচনটোক যথেষ্ট গুৰুত্বপূৰ্ণ বুলি মন্তব্য কৰি আগাঠায়ে কয়, ‘মই মোৰ প্ৰতিদন্দী গৰাকীৰ সৈতে কোনো ধৰণৰ বিতৰ্কত যাব খোজা নাই। কিন্তু সকলোকে মই এইটো স্পষ্ট কৰিব খোজো যে মোৰ সমষ্টি তথা ৰাজ্যখনৰ বাবে মোৰ এটা সপোন আছে আৰু এই উদ্দেশ্যে নিৰ্বাচনত প্ৰতিদন্দীতাত অৱতীৰ্ণ হৈছো।’