আৰক্ষীয়ে ৰাজা ৰঘুবংশী হত্যাকাণ্ডৰ মূল অভিযুক্ত হিচাপে তেওঁৰ পত্নী সোণমৰ নাম উল্লেখ কৰিছিল। শেহতীয়াকৈ শ্বিলঙৰ নিম্ন আদালতে সোণম ৰঘুবংশীৰ জামিন মঞ্জুৰ কৰিছিল। মেঘালয় উচ্চ ন্যায়ালয়েও জামিন বাহাল ৰাখে। উচ্চ ন্যায়ালয়ৰ এই সিদ্ধান্তক প্ৰত্যাহ্বান জনাই মেঘালয় চৰকাৰে এইবাৰ উচ্চতম ন্যায়ালয়ৰ কাষ চাপিছে। তেওঁলোকে আৰ্জি জনাইছে যে সোণমৰ জামিন অনতিপলমে বাতিল কৰিব লাগে।
মেঘালয় চৰকাৰৰ অধিবক্তা তথা কেন্দ্ৰৰ ছলিচিটৰ জেনেৰেল তুষাৰ মেহতাই উচ্চতম ন্যায়ালয়ৰ অৱসৰকালীন বিচাৰপীঠৰ ওচৰত এই গোচৰৰ জৰুৰী শুনানিৰ বাবে অনুৰোধ জনাইছে। আদালতে সেই আবেদন মানি লৈছে। শুকুৰবাৰে এই গোচৰৰ শুনানি হ’ব পাৰে।
তুষাৰ মেহতাই আদালতত কয় যে সোণমক গ্ৰেপ্তাৰ কৰাৰ সময়ত গ্ৰেপ্তাৰৰ কাৰণ অৱগত কৰা হোৱা নাছিল আৰু আদালতে তেওঁক কেৱল এই যুক্তিৰ আধাৰতে জামিন প্ৰদান কৰিছিল। কিন্তু কিছুমান টাইপোগ্ৰাফিক ভুলৰ বাবেই সেইটো হৈছিল। তুষাৰে আদালতত যুক্তি দিয়ে যে কেৱল এই কাৰণতে কাৰোবাক জামিন প্ৰদান কৰিব নোৱাৰি। তেওঁ দাবী কৰে যে সোণম জামিনত বাহিৰত থাকিলে পলায়ন কৰিব পাৰে।
২০২৫ চনৰ মে’ মাহত ৰাজা আৰু সোণম মেঘালয়ৰ পূব খাছি পাহাৰত হানিমুনলৈ গৈছিল। হঠাতে দুয়োজন সোহৰাৰ পৰা সন্ধানহীন হৈ পৰে। পৰিয়ালৰ লোকে আৰক্ষীৰ কাষ চাপিল। আৰক্ষীয়ে তালাচী আৰম্ভ কৰি কিছুদিন পিছত এটা খাৱৈৰ পৰা ৰাজাৰ মৃতদেহ উদ্ধাৰ কৰে। তেতিয়াও সোণমক কোনেও সন্দেহ কৰা নাছিল। পিছত আৰক্ষীয়ে তেওঁক আটক কৰে। সোধা-পোছাৰ অন্তত তেওঁক গ্ৰেপ্তাৰ কৰা হয়। তদন্ত আগবাঢ়ি যোৱাৰ লগে লগে এই ঘটনাৰ ৰহস্যৰ গভীৰ হৈ পৰে। অভিযোগ অনুসৰি প্ৰেমিক ৰাজ কুশৱাহা আৰু আন তিনিজন লোকৰ সহযোগত সোণমে ৰাজাক হত্যা কৰাৰ ষড়যন্ত্ৰ কৰে। আৰক্ষীয়ে এজন এজনকৈ আটাইকেইজনক গ্ৰেপ্তাৰ কৰিছিল। আৰক্ষীয়ে ৫ অভিযুক্ত – সোণম, ৰাজ, বিশাল, আকাশ আৰু আনন্দৰ বিৰুদ্ধে ৭৯০ পৃষ্ঠাৰ অভিযোগনামা আদালতত দাখিল কৰে।
সোণমৰ গোচৰৰ বিৰুদ্ধে যুঁজ দিছিল পূব খাছি পাহাৰ জিলা আৰু সত্ৰ আদালতৰ আইনী সাহায্য কোষে। তদন্তত তেওঁ সম্পূৰ্ণ সহযোগিতা আগবঢ়াব বুলি আদালতত জনায় সোণমে। আৰক্ষীয়ে আদালতত জনোৱা মতে, ৰাজাক হত্যা কৰাৰ পিছত সোণমে শ্বিলঙৰ পৰা ইন্দোৰলৈ কেইবাটাও পথ সলনি কৰে। তাতেই প্ৰেমিক ৰাজ কুশৱাহাৰ ঘৰত ৩-৪ দিন থাকে। ৩-৪ দিনৰ মূৰত ৰাজে সোণমক ইন্দোৰৰ দেৱাছৰ এটা ফ্লেটলৈ লৈ যায়।
তাত উপস্থিত হোৱাৰ লগে লগে সোণমে মোবাইলৰ চিমটো খুলি ৰাজক দিয়ে। ৰাজে তেওঁৰ বাবে নতুন চিম কাৰ্ডৰ ব্যৱস্থা কৰে। অৱশ্যে এই সকলোবোৰৰ পিছতো সোণম বেছি দিন লুকাই থাকিব নোৱাৰিলে। আৰক্ষীৰ জালত ধৰা পৰে। সোণমৰ তথ্যৰ ভিত্তিত আন অভিযুক্তসকলকো এজন এজনকৈ গ্ৰেপ্তাৰ কৰা হয়।
