আগৰতলাত আজিৰ পৰা আৰম্ভ হ’ব শিশু চলচ্চিত্ৰ মহোৎসৱ

ত্ৰিপুৰাৰ ৰাজধানী চহৰ আগৰতলাত আজিৰ পৰা তিনিদিনীয়া কাৰ্যসূচীৰ মাজেৰে আৰম্ভ হ’ব আগৰতলা শিশু চলচ্চিত্ৰ মহোৎসৱ।

এই চলচ্চিত্ৰ মহোৎসৱত হিন্দী, ইংৰাজী আৰু বেংগলী ভাষাৰ মুঠ ১০ খন ছবি নজৰুল কলাক্ষেত্ৰ প্ৰেক্ষাগৃহ আৰু ৰূপহী হলত প্ৰদৰ্শন কৰা হ’ব।

ত্ৰিপুৰাৰ শিক্ষা মন্ত্ৰী ৰতন লাল নাথে আজি নজৰুল কলাক্ষেত্ৰ প্ৰেক্ষাগৃহত আয়োজন কৰা এক গাম্ভীৰ্যপূৰ্ণ অনুষ্ঠানত শিশু চলচ্চিত্ৰ মহোৎসৱৰ তিনিদিনীয়া কাৰ্যসূচীৰ আনুষ্ঠানিক শুভাৰম্ভণি কৰিব। এই অনুষ্ঠানত চিল্ড্ৰেনছ ফিল্ম ছ’চাইটি ইণ্ডিয়াৰ প্ৰশাসনীয় বিষয়া ৰাজেশ গোয়েল, ত্ৰিপুৰা শিশু সুৰক্ষা অধিকাৰ আয়োগৰ অধ্যক্ষ নিলীমা ঘোষৰ লগতে বহুতো গণ্য মান্য ব্যক্তি উপস্থিত থাকিব।

উল্লেখ্য যে এই তিনিদিনীয়া মহোৎসৱৰ লগতে সংগতি ৰাখি চিল্ড্ৰেনছ ফিল্ম ছ’চাইটি ইণ্ডিয়া আৰু ত্ৰিপুৰাৰ তথ্য আৰু সাংস্কৃতিক বিভাগে শিশুসকলৰ বাবে স্ক্ৰীপ্ট ৰাইটিং, অভিনয়, টু ডি এনিমেশ্যন আৰু চিনেমা পৰিচালনাৰ এখনি কৰ্মশালাৰো আয়োজন কৰিছে।