শুকুৰবাৰে উচ্চতম ন্যায়ালয়ে ‘মহাপ্ৰভু জগন্নাথ’ নামৰ এনিমেটেড ছবিখন সমগ্ৰ ভাৰততে ২৮ জুলাই বা তাৰ পাছত অৰ্থাৎ ভগৱান জগন্নাথৰ ৰথযাত্ৰাৰ পাছত মুক্তি দিয়াৰ অনুমতি প্ৰদান কৰিছে। ন্যায়াধীশ বি ভি নাগাৰত্না আৰু আৰ মহাদেৱনৰ বিচাৰপীঠে উল্লেখ কৰে যে এই ছবিখন ইতিমধ্যে ইউটিউবত মুক্তি পোৱা এখন ৱেব ছিৰিজৰ ওপৰত আধাৰিত আৰু চেণ্ট্ৰেল বৰ্ড অৱ ফিল্ম চাৰ্টিফিকেচনে ইয়াক প্ৰদৰ্শনৰ বাবে প্ৰমাণপত্ৰ প্ৰদান কৰিছে। ছবিখন শুকুৰবাৰে চিনেমাঘৰত মুক্তি পোৱাৰ কথা আছিল, কিন্তু ওড়িশা উচ্চ ন্যায়ালয়ে ইয়াৰ মুক্তিৰ ওপৰত স্থগিতাদেশ জাৰি কৰিছিল। ইয়াৰ পিছতে ছবিখনৰ প্ৰযোজকসকলে এই নিৰ্দেশক প্ৰত্যাহ্বান জনাই উচ্চতম ন্যায়ালয়ৰ কাষ চাপিছিল।
ৰাজ্য চৰকাৰৰ হৈ আদালতত উপস্থিত থকা ছলিচিটৰ জেনেৰেল তুষাৰ মেহতাই কয় যে বৃহস্পতিবাৰৰ পৰা ওড়িশা আৰু দেশৰ অন্যান্য প্ৰান্তত পবিত্ৰ ৰথযাত্ৰা আৰম্ভ হৈছে। ইয়াৰ পূৰ্বে ওড়িশা উচ্চ ন্যায়ালয়ে ছবিখন প্ৰদৰ্শনৰ আগতে ভগৱান জগন্নাথক উপস্থাপন কৰা ধৰণৰ ওপৰত উঠা আপত্তিৰ বিতং ন্যায়িক পৰীক্ষাৰ প্ৰয়োজন আছে বুলি মত প্ৰকাশ কৰিছিল। অংগুলৰ মহেশ কুমাৰ সাহু, পুৰীৰ ডাঃ প্ৰমোদ কুমাৰ আচাৰ্য আৰু নিমাপাৰাৰ উমাশংকৰ আচাৰ্য নামৰ কেইগৰাকীমান ব্যক্তিয়ে দাখিল কৰা এখন ৰাজহুৱা স্বাৰ্থজড়িত আৱেদনৰ শুনানি গ্ৰহণ কৰি উচ্চ ন্যায়ালয়ে এই অন্তৱৰ্তীকালীন নিৰ্দেশ দিছিল।
উক্ত আৱেদনখনত চেন্সৰ বৰ্ডে ছবিখনক দিয়া প্ৰমাণপত্ৰ বাতিল কৰিবলৈ আৰু ওড়িশাত ইয়াৰ ৰাজহুৱা প্ৰদৰ্শন বন্ধ কৰিবলৈ দাবী জনোৱা হৈছিল। আৱেদনকাৰীসকলে ছবিখনত দেখুওৱা ভগৱান জগন্নাথৰ শৈশৱৰ কাল্পনিক কাহিনী, সংলাপ আৰু যুদ্ধৰ দৃশ্যসমূহক লৈ তীব্ৰ আপত্তি দৰ্শাইছিল। তেওঁলোকৰ মতে ছবিখনৰ এই দৃশ্যসমূহ স্কন্দ পুৰাণ, ব্ৰহ্ম পুৰাণ আৰু মন্দিৰৰ দীৰ্ঘদিনীয়া পৱিত্ৰ পৰম্পৰাৰ সম্পূৰ্ণ পৰিপন্থী।
