সমগ্ৰ ভাৰতবৰ্ষৰ লগতে অসমৰ ইছলাম ধৰ্মীৱলম্বী লোকসকলে বৃহস্পতিবাৰৰ পৰা ৰমজানৰ ৰোজা পালন কৰিব। বুধবাৰে গুৱাহাটী মহানগৰীকে ধৰি সমগ্ৰ ৰাজ্যজুৰি সন্ধিয়াৰ আকাশত জোন বিচাৰি সৃষ্টি হোৱা কেইবাঘণ্টাজোৰা উৎকণ্ঠাৰ অন্তত এই কথা সদৰী কৰে কেন্দ্ৰীয় হিলাল কমিটীৰ ৰাজ্যিক সভাপতি মৌলানা ফকৰউদ্দিন আহমেদ কাছিমীয়ে।
আজিৰে পৰা আৰম্ভ হ’ল ইছলাম ধৰ্মাৱলম্বীসকলৰ ইবাদতৰ শ্ৰেষ্ঠ মাহ ‘ৰমজান’। ৰাজ্যবাসীক পৱিত্ৰ ৰমজানৰ শুভেচ্ছা জ্ঞাপন কৰি ৰাজ্যিক কমিটীৰ সভাপতিগৰাকীয়ে পৱিত্ৰ ৰমজানৰ সময়ছোৱাত ৰাজ্যৰ শান্তি-সম্প্ৰীতি অটুট ৰখাৰ আহ্বান জনাইছে। তদুপৰি এই পৱিত্ৰ ৰমজান মাহতে ৰাজ্যৰ সম্প্ৰীতি, পৰস্পৰা আৰু ভাতৃত্ববোধৰ এনাজৰীডাল যাতে আৰু শক্তিশালী হয়, তাৰ বাবে ৰাজ্যবাসীক আহ্বান জনাইছে কেন্দ্ৰীয় হিলাল কমিটীয়ে।
তদুপৰি, পৱিত্ৰ ৰমজান মাহত যাতে কোনো দুষ্কৃতিকাৰীয়ে ৰাজ্যত অপ্ৰীতিকৰ পৰিস্থিতি সৃষ্টি কৰিব নোৱাৰে, তাৰ বাবে ৰাজ্য চৰকাৰৰ লগতে সমগ্ৰ জিলা প্ৰশাসন আৰু বেচৰকাৰী অনুষ্ঠান-প্ৰতিষ্ঠানক কঠোৰ দৃষ্টি ৰাখিবলৈ আহ্বান জনাইছে।
আনহাতে, কমিটীৰ উপ-সভাপতি জহুৰউদ্দিন আহমেদ আৰু ৰাজধানী মহানগৰীৰ আঠগাঁও কবৰস্থানৰ উপদেষ্টা কাজি নেকিব শইকীয়াই সমগ্ৰ ৰাজ্যবাসীক ৰমজানৰ শুভেচ্ছা জ্ঞাপন কৰি এই পৱিত্ৰ ৰমজানৰ ৰোজাই ৰাজ্যবাসীৰ অন্তৰত পৰস্পৰ ভাতৃত্ববোধ জগাই তুলিব বুলি আশা ব্যক্ত কৰে।
