অসম চৰকাৰে এইবাৰ নগাঁও চহৰত কেন্দ্ৰীয়ভাৱে আন্তৰ্জাতিক যোগ দিৱস উদযাপন কৰিব। অহা ২১ জুনত নগাঁও চহৰৰ নুৰুল আমিন ষ্টেডিয়ামত উদযাপিত হ’ব লগা চতুৰ্থ আন্তৰ্জাতিক যোগ দিৱসৰ প্ৰতি লক্ষ ৰাখি আৰু যোগৰ জাগৰণ সৃষ্টি কৰা উদ্দেশ্যে আজি পুৱাৰ ভাগত নগাঁও চহৰত যোগ সম্প্ৰীতি দৌৰ অনুষ্ঠিত হয়।
নগাঁও জিলা প্ৰসাশনৰ উদ্যোগত অনুষ্ঠিত হোৱা এই যোগ সম্প্ৰীতি দৌৰত জিলাখনৰ সহস্ৰাধিক লোকে অংশগ্ৰহণ কৰে। নগাঁও পুলিচ ৰিজাৰ্ভ খেলপথাৰৰ পৰা এই সম্প্ৰীতি দৌৰ উলিয়াই চহৰৰ মাজেৰে আহি পুনৰ নগাঁও পুলিচ ৰিজাৰ্ভ খেলপথাৰত সামৰণী মৰাৰ পিছতে অংশগ্ৰহণ কৰা সকলোৱে যোগ প্ৰদৰ্শন কৰে।
নগাঁও সদৰ বিধানসভা সমষ্টিৰ বিধায়ক ৰূপক শৰ্মা, নগাঁও জিলাৰ উপায়ুক্ত বিশ্বজিত পেগু, জিলা আৰক্ষী অধীক্ষক শংকৰব্ৰত ৰায় মেধি, নেহেৰু যুৱ কেন্দ্ৰৰ গাণনিক বিষয়া ধনঞ্জয় তালুকদাৰ আৰু অন্যান্য বিষয়-ববীয়াৰ লগতে বিভিন্ন লোকে অংশগ্ৰহণ কৰে।
উল্লেখ্য যে, নগাঁও জিলা প্ৰশাসনৰ উদ্যোগত অনুষ্ঠিত এই যোগ সম্প্ৰীতি দৌৰ অনুষ্ঠানত জিলা ক্ৰীড়া বিষয়া কাৰ্যালয়, জিলা এন চি চি, আয়ুস মিশ্যন, ৰাজ্যিক যোগ কেন্দ্ৰ(নিৰ্বাণ), নেহৰু যুৱ কেন্দ্ৰ, অসম যোগ সন্থা, পতঞ্জলি, নগাঁও জিলা যোগ সন্থাকে প্ৰমুখ্য কৰি বিভিন্ন দল-সংগঠনৰ প্ৰতিনিধিয়ে অংশগ্ৰহণ কৰে।
আনহাতে, নুৰুল আমিন ষ্টেডিয়ামত উদযাপন হ’ব লগা আন্তৰ্জাতিক যোগ দিৱসত অসমৰ মুখ্যমন্ত্ৰী সৰ্বানন্দ সোণোৱাল, কেন্দ্ৰীয় ৰেল ৰাজ্যমন্ত্ৰী ৰাজেন গোহাঁই, ৰাজ্যৰ বিত্ত আৰু গড়কাপ্তানি বিভাগৰ মন্ত্ৰী ড° হিমন্ত বিশ্ব শৰ্মা, জলসম্পদ মন্ত্ৰী কেশৱ মহন্ত, বিধায়ক ৰূপক শৰ্মাৰ উপৰি ভালেসংখ্যক ৰাজনৈতিক নেতা আৰু বিশিষ্ট ব্যক্তিয়ে অংশগ্ৰহণ কৰিব।