আৰক্ষীৰ জিম্মাত শ্ৰমিকক নিৰ্য্যাতনৰ প্ৰতিবাদে ভয়ংকৰ ৰূপ লয় দৰঙৰ ধুলা অঞ্চলত : আৰক্ষীৰ গুলীত এজন প্ৰতিবাদকাৰী নিহত
দৰং জিলাৰ আৰক্ষী জিম্মাত এজন শ্ৰমিকৰ মৃত্যক কেন্দ্ৰ কৰি জিলাখনৰ ধুলাত আজি এক উত্তেজনাময় পৰিস্থিতিৰ সৃষ্টি হৈছে। জানিব পৰা মতে ধুলা অঞ্চলৰ বাসিন্দা হাছান আলীক কালি আৰক্ষীয়ে এটা গোচৰত আটক কৰি আনিছিল। কিন্তু ৰাতি আৰক্ষীৰ উপৰ্যুপৰি নিৰ্য্যাতনৰ ফলত গুৰুতৰভাৱে স্বাস্থ্যৰ অৱনতি ঘটে আলীৰ। তেওঁক আজি জি এম চি এইচ্ছলৈ অনাৰ পিছতে মৃত্যু হয়।
ইয়াৰ পিছতে উত্তেজিত ৰাইজে ধুলা আৰক্ষী থানা ঘেৰাও কৰে। উত্তেজিত জনতাই লাহে লাহে থানাত আক্ৰমণো কৰে। প্ৰতিবাদৰ ঘটনাটোত আমছুৱেও অংশ গ্ৰহণ কৰিছিল বুলি জানিব পৰা গৈছে।
প্ৰতিবাদকাৰীসকলে আৰক্ষীলৈ শিলগুটি দলিওৱাৰ লগতে, যান-বাহনৰ ক্ষতি সাধন কৰে। প্ৰত্যুত্তৰত আৰক্ষীয়েও শূন্যলৈ গুলী চালনা কৰে আৰু লগতে কন্দুৱা গেছ প্ৰয়োগ কৰে।
এই মাত্ৰ অহা খবৰ মতে আৰক্ষীৰ গুলীত এজন প্ৰতিবাদকাৰীৰ মৃত্যু হৈছে। নিহত প্ৰতিবাদকাৰীজনৰ নাম ময়িদুল ইচলাম (২০) বুলি জানিব পৰা গৈছে। আন এজন গুলীবিদ্ধ প্ৰতিবাদকাৰীক গুৱাহাটীলৈ চিকিৎসাৰ বাবে প্ৰেৰণ কৰা বুলি সূত্ৰটোৰ পৰা জানিব পৰা গৈছে।
প্ৰতিবাদকাৰীৰ আক্ৰমণত আৰক্ষীৰো কেইবাজনো লোক আহত হোৱা বুলি জনাইছে সূত্ৰটোৱে।
এতিয়াও প্ৰতিবাদকাৰীসকলে থানাখন ঘেৰাও কৰি ৰাখিছে আৰু পৰিস্থিতি যিকোনো সময়তে অতি বিস্ফোৰক অৱস্থালৈ গতি কৰিব পাৰে বুলি জনাইছে সূত্ৰটোৱে।
আনহাতে ঘটনা সন্দৰ্ভত ৰাজ্যৰ আৰক্ষী বিভাগে তৎকালীনভাৱে কাৰ্য্যকৰী হোৱাকৈ থানাখনৰ ভাৰপ্ৰাপ্ত বিষয়া ৰঞ্জিত হাজৰিকাক নিলম্বন কৰিছে।
লগতে অঞ্চলটোত অনিৰ্দিষ্টকালীনভাৱে সান্ধ্য আইন জাৰি কৰা হৈছে আৰু সেনা মোতায়েন কৰা হৈছে। ১৫ নং ৰাষ্ট্ৰীয় ঘাই পথেৰে যান-বাহনৰ চলাচল বন্ধ হৈ পৰা বুলি জনা গৈছে।