আৰক্ষীৰ পৰিচয় দি এগৰাকী মহিলাক ধৰ্ষণ কৰাৰ অভিযোগ উত্থাপন হৈছে দুগৰাকী ব্যক্তিৰ বিৰুদ্ধে।
শেহতীয়াকৈ মধ্যপ্ৰদেশৰ অশোক নগৰ জিলাৰ এখন থানাত সংঘটিত হৈছে এই ঘটনা।
শনিবাৰে আৰক্ষীয়ে এই বিষয়ে অৱগত কৰে। জানিব পৰা মতে, ভুক্তভোগী মহিলাগৰাকীৰ বয়স প্ৰায় ৩০ বছৰ। মহিলাগৰাকীয়ে ৰে’ল হেৰুৱাই ষ্টেচনত স্বামীৰ বাবে অপেক্ষা কৰি থকাৰ সময়তে দুজন লোকে মহিলাগৰাকীক ধৰ্ষণ কৰিছিল।
আৰক্ষীৰ সূত্ৰৰ পৰা জানিব পৰা মতে, ৰাজস্থানৰ জয়পুৰলৈ যোৱা এখন ৰে’ল ধৰিবলৈ এই দম্পতীহালে ষ্টেচনলৈ আহিছিল। কিন্তু তেওঁলোকে সেই ৰেলখন হেৰুৱাই পেলালে।
ইয়াৰ পিছত মহিলাগৰাকীৰ স্বামীয়ে সুৰাৰ সন্ধানত ষ্টেচনৰ বাহিৰলৈ ওলাই যায়। সেই সময়ত সাধাৰণ কাপোৰ পিন্ধা দুজন মানুহ আহি পুলিচ বুলি পৰিচয় দি ভদ্ৰমহিলাগৰাকীৰ টিকটটো চাব বিচাৰে। তাৰ পাছত মহিলাগৰাকীৰ স্বামী উভতি আহিল।
দম্পতীহালে ব্যক্তি দুজনৰ পৰিচয় পত্ৰ চাবলৈ বিচাৰেতো এজন অভিযুক্তই মহিলাগৰাকীৰ স্বামীক প্ৰহাৰ কৰিবলৈ ধৰে আৰু আন গৰাকীয়ে মহিলাগৰাকীক ৰেলপথৰ সমীপৰ জোপোহালৈ লৈ গৈ ধৰ্ষণ কৰাৰ অভিযোগ উত্থাপন হৈছে। পিছত আনজন ব্যক্তিয়েও মহিলাগৰাকীক ধৰ্ষণ কৰাৰ অভিযোগ উত্থাপন হৈছে।
এই ঘটনা সন্দৰ্ভত ভাৰতীয় দণ্ডবিধিৰ ৩৭৬ (ডি) ধাৰাত গোচৰ ৰুজু কৰা হৈছে। অভিযুক্তৰ পৰিচয় জানিব পৰা হোৱা নাই। আৰক্ষীয়ে দুজন অচিনাক্ত ব্যক্তি হিচাপে গোচৰ ৰুজু কৰি চিনাক্তকৰণৰ চেষ্টা চলাইছে।
